މާލޭގެ ގެއަކަށް މީހަކު އޮޅުވާލައިގެން ވައްދައި، ބަރަހަނާ ކުރުމަށްފަހު ބިރު ދައްކައިގެން ކޭޝް ކާޑުގެ ޕިން ނަމްބަރު ހޯދުމަށްފަހު އެކައުންޓްގައިވާ ފައިސާތައް ފޭރުނު މައްސަލައަކީ މިދިޔަ ޖުލައި މަހުގެ ތެރޭގައި ހިނގި ކަމެކެވެ.
އެ ހާދިސާގައި މއ. މަސްފަން ކިޔާ ގެއަށް މީހަކު ވައްދައިގެން ފޭރުނު މައްސަލާގައި ދައުވާ ކޮށްފައިވަނީ އެގޭ އާއިޝަތު އާއި އެގޭ މުހައްމަދު ރީހާން އަދި ސ. ހިތަދޫ ސޯމާ، ޝަފީގު އިބްރާހީމްގެ މައްޗަށެވެ.
އެ މީހުންގެ މައްޗަށް ކޮށްފައިވަނީ އެނގި ހުރެ ހުއްދަ ނޫން ގޮތުގައި މައުލޫމާތު ހޯދުމުގެ ކުށުގެ ދައުވާ އާއި އަނިޔާއެއް ދިނުމުގެ ކުށުގެ ދައުވާގެ އިތުރުން ފޭރުމުގެ ދައުވާ އެވެ. އެ ތިން މީހުން ވަނީ ކޯޓުގައި ކުށަށް އެއްބަސްވެފަ އެވެ.
ފޭރުމުގެ ކުށުގެ އަދަބަކީ ނުވަ މަހާއި 18 ދުވަހަށް ޖަލަށް ލުމެވެ. އަދި އަނިޔާއެއް ދިނުމުގެ ކުށުގެ އަދަބަކީ ދެ މަހާއި 12 ދުވަހަށް ޖަލަށް ލުމެވެ. އަދި ހުއްދަ ނޫން ގޮތުގައި މައުލޫމާތު ހޯދުމުގެ ކުށުގެ އަދަބަކީ ހަތަރު މަހާއި 24 ދުވަހަށް ޖަލަށްލުމެވެ.
ތިން މީހުންގެ މައްޗަށް އިއްވި ހުކުމުގައިވަނީ އެ ތިން މީހުން ޖުމްލަ އެއް އަހަރާއި ތިން މަސް ދުވަހަށް ޖަލަށްލުމަށެވެ.
