އެންޓި ކޮރަޕްޝަން ކޮމިޝަންގެ ގާނޫނަށް ހުށައެޅި އިސްލާހުތައް ދިރާސާކުރުމަށް ފަހު ކޮމެޓީން ހުށައެޅި ރިޕޯޓަށް ވާހަކަ ދައްކަވަމުން ރައްޔިތުން މަޖިލީހުގެ ނައިބު ރައީސް އަހްމަދު ނާޒިމް ވިދާޅުވީ ސްޓެލްކޯއިން ބަޔަކަށް ބަދަލު ދޭން ނިންމި މައްސަލަ މަޖިލީހުގެ އެސްއޯއީ ކޮމެޓީން ބަލަމުން އަންނަކަމަށެވެ.
ނާޒިމް ވިދާޅުވީ ސްޓެލްކޯއިން 8 މިލިއަން ޑޮލަރު އެތަނުގެ ކޮންޓްރެކްޓަރަކަށް ދޭން ސެޓްލްމަންޓް އެގްރީމެންޓެއް ހަދާފައިވާކަށެވެ. އަދި އެއީ ކޮވިޑްގެ ދުވަސްވަރާއި ގުޅުވާ ހަދާފައިވާ އެގްރިމެންޓެއް ކަމަށްވެސް ނާޒިމް ވިދާޅުވިއެވެ.
މި ކަމަށް އޭސީސީން މިހާތަނަށްވެސް ޖަވާބެއް ދީފައި ނުވުމުން އެ ފައިސާ ނުދައްކާ ކޮންމެ މަހަކަށް 2.5 އިންސައްތައިގެ ޖޫރިމަނާއެއް އަރަމުންދާކަމަށް ނާޒިމް ވިދާޅުވިއެވެ. އަދި މި ބަދަލު ހަމަޖައްސާފައި އޮތީ މަހުން މަހަށް ބަހާލައިގެން މަހަކު 2 ލައްކައެއް ހާ ޑޮލަރު ދައްކާގޮތަށް ކަމަށްވެސް ނާޒިމް ވިދާޅުވިއެވެ.
