ސިވިލް ކޯޓުން ބޭންކުގެ މައްޗަށް އަމުރުކޮށްފައިވަނީ، ޕެންޝަނަށް ދައްކަން ޖެހޭ ބައިމިލިއަނަށްވުރެ ގިނަ ރުފިޔާގެ ތެރެއިން ނުދައްކާ އޮތް ލައްކައެއްހާ ރުފިޔާ ދައްކާށެވެ. ޕެންޝަން އޮފީހުން ދައުވާ ކުރި މި މައްސަލައާ ގުޅިގެން ސިވިލް ކޯޓުން ބޭންކް އޮފް މޯލްޑިވްސްގެ މައްޗަށް އަމުރު ކުރީ ބޭންކުގައި އެފްއޭއެމްގެ ނަމުގައި އޮތް އެކައުންޓުން އެ ފައިސާ ދައްކާށެވެ.
މި ހިނގާ ނޮވެމްބަރު މަހުގެ ހަތްވަނަ ދުވަހު ކުރި މި އަމުރާ ގުޅިގެން ބޭންކުންވަނީ ސިވިލް ކޯޓަށް އެ ފައިސާ ދައްކާފައެވެ. އެއީ، 103،444 ރުފިޔާ 33 ލާރިއެވެ. މި ފައިސާއަކީ 2019 ވަނަ އަހަރު ކުރި ހުކުމަކާ ގުޅިގެން ދައްކަން ޖެހި ނުދައްކާވާ ފައިސާއެވެ.
އެފްއޭއެމުން އެތައް ބަޔަކަށް ދައްކަން ޖެހޭ އެތައް ފައިސާއެއް ނުދައްކައިގެން މިހާރުވެސް ކޯޓުތަކުގައި އެތައް މައްސަލައެއް އެބައޮތެވެ. އަދި އެތައް މިލިއަން ރުފިޔާއެއް ދައްކަން ބައިވަރު ހުކުމްތައްވެސް ކޮށްފައި އެބަހުއްޓެވެ.
އެފްއޭއެމްގެ ފައިސާއަށް ހިޔާނަތްތެރިވި މައްސަލައިގައި އެ އިދާރާގެ ކުރީގެ ރައީސް ބައްސާމް އަދީލް ޖަލީލްގެ މައްޗަށްވަނީ ޝަރީއަތް ފަށާފައެވެ.
