މި މައްސަލަ ބެލުމަށް ލޯކަލް ގަވަމަންޓް އޮތޯރިޓީއަށާއި ކަމާ ގުޅޭ އިދާރާތަކަށް ގޮވާލުމާއެކު، އައްޑޫ ސިޓީ ކައުންސިލުން މިކަން ކުރަމުންދަނީ ގާނޫނާ ހިލާފަށް ކަމަށް ބުނެފައިވެއެވެ.
މަދަނީ ޖަމިއްޔާތަކުން ފާހަގަކުރި ގޮތުގައި އައްޑޫ ސިޓީގެ ހިތަދޫ، ހުޅުމީދޫ، މީދޫ އަދި ގައުކެނޑި އާއި ހަންކެޑަ ފަދަ ރަށްތަކުގެ ހޭޅިފަށަށް ބޮޑެތި ގެއްލުންތަކެއް ވަނީ ދީފައެވެ. މިކަން ކުރަމުންދަނީ އީޕީއޭގެ ހުއްދަ ނުހޯދައި، ތިމާވެށްޓަށް ކުރާނެ އަސަރު ދިރާސާ ނުކޮށް، އަދި ރައްޔިތުންގެ ހިޔާލު ނުހޯދައި ކަމަށް ބުނެއެވެ.
ހިތަދޫގެ ފެހެލިކިޅީގެ ބައެއްގެ އިތުރުން، މެދެއާރިކިޅިއާއި އިންވެގެން އޮތް ގަސްގަހާގެހީގެ ބަފަ ޒޯން ވެސް ވަނީ ނައްތާލަން ފަށާފައެވެ.
ގެވަޅު ދޫކުރުމަށް ގަސްތައް ނައްތާލަމުންދާ ކަމަށް ކައުންސިލުން ބުނި ނަމަވެސް، މިއީ ބަލައިގަނެވޭނެ ސަބަބެއް ނޫން ކަމަށް މަދަނީ ޖަމިއްޔާތަކުން ބުނެއެވެ. އެއީ އައްޑޫ ސިޓީގެ ހުޅަނގު ފަޅީގެ ހުރިހާ ރަށެއްގެ ފަރުތައް ވަނީ 1.3 ބިލިއަން ރުފިޔާ ހޭދަކޮށް ހިއްކާފައި ކަމަށާއި، އެއީ ކުރިއަށް އޮތް 50 އަހަރަށް ވާވަރަށް ކަމަށް މޭޔަރު ބުނެފައިވާތީކަމަށް ޖަމިއްޔާތަކުން ގުޅިގެން ނެރުނު ބަޔާނުގައި ބުނެފައިވެއެވެ.
