އެމަނިކުފާނު މިހެން ގޮވާލައްވާފައި މިވަނީ ފަލަސްތީނުގެ ރައްޔިތުންނާ އެއްބައިވަންތަކަން ހާމަކުރުމުގެ ބައިނަލްއަގްވާމީ ދުވަހުގެ މުނާސަބަތުގައި ދެއްވި މެސެޖެއްގައެވެ.
ރައީސް މުއިއްޒު ވިދާޅުވީ ޢަދުލުއިންސާފާއި ސުލްހަވެރިކަމާއެކު ދިރިއުޅުމުގެ ހައްގު ހޯދުމަށް ފަލަސްތީނުން ކުރަމުންދާ މަސައްކަތުގެ ބައިވެރިއެއްގެ ގޮތުގައި ރާއްޖެއިން ދެމިއޮންނާނެކަމުގެ ޔަޤީންކަން ދެއްވާކަމަށެވެ.
ރައީސުލްޖުމްހޫރިއްޔާގެ މެސެޖުގައި، ފަލަސްތީނުގެ ހައްގުގައި ރާއްޖެއިން ދޭ އެއްބާރުލުމަކީ، ރާއްޖޭގެ އެކި ކަންކޮޅުތަކުގައި ދިރިއުޅޭ އެންމެހާ ރައްޔިތުން ހިއްސާކުރާ ކަމެއް ކަމުގައި ފާހަގަކުރެއްވިއެވެ.
ރައީސް ޑރ. މުިއއްޒު ވަނީ އިޒްރޭލަށް ހަތިޔާރު ވިއްކުން މި ހިނދުން މި ހިނދަށް ހުއްޓާލުމަށާއި، ހަނގުރާމައިގެ ޖަރީމާތަކުގައި ޒިންމާވާންޖެހޭ ފަރާތްތައް ޖަވާބުދާރީ ކުރުވުމަށް، ބައިނަލްއަގްވާމީ މުޖުތަމައު އެއްބައިވެ، އެޤައުމެއްގެ ސިޔާސީ ވިސްނުމާއި އިގްތިސާދީ ބާރުގެ ބޭނުންހިފުމަށް ގޮވާލައްވާފައެވެ.
ފަލަސްތީނުގެ ރެފިއުޖީންގެ ހައްގުގައި އދ.ގެ ރިލީފް އެންޑް ވޯކްސް އެޖެންސީ (ޔޫ.އެން.އާރު.ޑަބްލިއު.އޭ) އަދާކުރަމުންގެންދާ މުހިންމު ދައުރަށް 75 އަހަރަށްވުރެ ގިނަ ދުވަސްވެފައިވާކަން ފާހަގަކުރައްވައި، އެ އެޖެންސީން ކުރަމުންގެންދާ ހައްސާސް މަސައްކަތްތަކަށް ހުރިހާ ޤައުމުތަކުންވެސް އެއްބާރުލުން ދެއްވުމަށްވެސް ރައީސް މުއިއްޒު ވަނީ ގޮވާލައްވާފައެވެ.
ރައީސް ޑރ. މުިއއްޒު ވިދާޅުވީ ބައިނަލްއަގްވާމީ ގާނޫނުތަކާއި، ބައިނަލްއަގްވާމީ އިންސާނީ ހައްގުތަކާބެހޭ ޤާނޫނާއި، އިންސާނީ އެހީގެ ގާނޫނުތަކާ ތަކުރާރުކޮށް ހިލާފުވެ، އިޒްރޭލުން ހިންގަމުންދާ ލާއިންސާނީ ގަތުލުއާންމުގެ ޖަރީމާތަކާއި، އިޒްރޭލުގެ ލާއިންސާނީ އަމަލުތަކަކީ ހަމައެކަނި ފަލަސްތީނުގެ ރައްޔިތުންނަށް ދެވޭ އަނިޔާއެއް ނޫންކަމަށެވެ. އަދި އެއީ މުޅި ދުނިޔޭގެ އެކި ކަންކޮޅުތަކަށް ފެތުރިފައިވާ ޤައުމުތަކުގެ ގުޅިފައިވާ ނިޒާމަށް ދެވޭ ހަމަލާއެއްކަމަށާއި ބައިނަލްއަގްވާމީ މުޖުތަމައުން، ފަލަސްތީނުގެ ރައްޔިތުންގެ ހައްގުތައް ހިމާޔަތްކޮށް، އިޒްރޭލު ޖަވާބުދާރީ ކުރުވަން ޖެހޭކަމަށްވެސް ރައީސްް ޑރ. މުއިއްޒު ވިދާޅުވިއެވެ.
މިމައްސަލައަށް ދެމެހެއްޓެނިވި ހައްލެއް ގެނެވޭނީ، 1967 ވަނަ އަހަރުގެ ކުރިން އޮތް ބޯޑަރުތަކުގެ މައްޗަށް ބިނާކޮށް، ފަލަސްޠީނުގެ މިނިވަން އަދި އިސްތިޤްލާލީ ދައުލަތެއް ޤާއިމުކުރެވި، އިރުމަތީ ޤުދުސްއަކީ ފަލަސްޠީނުގެ ވެރިރަށް ކަމުގައި ކަނޑައަޅައިގެންކަންވެސް ރައީސް ޑރ. މުއިއްޒު ވަނީ ފާހަގަކުރައްވާފައެވެ.
