ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތުގެ ގްރޫޕް ސީގައި މިއަދު ހަވީރު ކ. ގުރައިދޫ އަތުން ކުރެންދޫވަނީ މޮޅުވެފައެވެ. މިއަދުގެ މެޗުން ކުރެންދޫ މޮޅުވީ އެއް ލަނޑު ސުން ލަނޑުންނެވެ. މި މެޗުން ބަލިވި ނަމަވެސް, ގުރައިދޫ އަށް ވެސް ވަނީ ދެ ވަނަ ބުރުގެ ޖާގަ ޔަގީންވެފަ އެވެ. ކެޓީ ހުރާއެވެ.
ގްރޫޕް ސީގެ އެއް ވަނަ ހޯދީ ފަސް ޕޮއިންޓް ހޯދި އައްޑޫ ސިޓީ އެވެ. ދެ ވަނަ ހޯދި ގުރައިދޫ އާއި ތިން ވަނަ ހޯދި ކުރެންދޫ އަށް ވަނީ ހަތަރު ޕޮއިންޓް ލިބިފަ އެވެ. ފުލުގައި އޮތް ހުރާއަށް ލިބުނީ ތިން ޕޮއިންޓެވެ.
ގޯލްޑް ކަޕްގެ ދެ ވަނަ ބުރު ކުރިއަށްދާނީ ފުރަތަމަ ބުރުގެ 17 ޓީމުގެ ތެރެއިން އެންމެ ރަނގަޅު 12 ޓީމު، ހަތަރު ގްރޫޕަކަށް ބަހާލައިގެންނެވެ. ދެ ވަނަ ބުރުގެ 12 ޖާގައިގެ ތެރެއިން އަށް ޖާގައެއް ވަނީ މިހާރު ކަށަވަރުވެފަ އެވެ. އެ ޖާގަތައް ހޯދީ، ގުރައިދޫ، ކުރެންދޫ، އައްޑޫ ސިޓީ، ފުވައްމުލައް ސިޓީ، މާލެ ސިޓީ، ބ. އޭދަފުށި، ރ. އަލިފުށި އަދި ތިމަރަފުށިންނެވެ.
