އަލިމަސް ކާނިވަލަކީ މަޖީދިއްޔާ ސްކޫލަށް 75 އަހަރު ފުރުމުގެ މުނާސަބަތުގައި 2004 ވަނަ ބޮޑު ކާނިވަލެއްގެ ގޮތުގައި ހުޅިވިތަނެކެވެ. އެތަނުގައި އެތައް ދުވަހެއް ވަންދެން ކާނިވާ ހިންގުމަށްފަހު މިހާރު އެތަން ބޭނުންކުރަނީ ސިޔާސީ ޕާޓީތަކުން ޖަލްސާތައް ބޭއްވުމަށާއި މިއުޒިކް ޝޯތައް ބޭއްވުމަށެވެ.
މާލޭ ސިޓީ ކައުންސިލުން ބުނީ އެ ކައުންސިލުގެ ބެލުމުގެ ދަށުގައިވާ، ކާނިވަލް ސަރަހައްދުގައި އިމާރާތް ކުރެވިފައިވާ ސްޓޭޖް ތަޅާލުމަށްފަހު އައު ސްޓޭޖެއް ތަރައްޤީ ކުރަން ނިންމާފައިވާކަމަށެވެ. އަދި މަސައްކަތް އަމިއްލަ ތަކެތީގައި ކޮށްދޭނެ ފަރާތެއް ހޯދުމަށް އެ ކައުންސިލުން ވަނީ ހުޅުވާލާފައެވެ.
މާލޭ ސިޓީ ކައުންސިލުން ބުނީ މި މަސައްކަތް ކޮށްދޭން ޝައުގުވެރިވާ ފަރާރްތަކަށް އެކަމާއި ގުޅޭ މައުލޫމާތު ދިނުމުގެ ބައްދަލުވުމެއް މިމަހުގެ 11 ވަނަދުވަހު ކައުންސިލްގެ އިދާރާގެ އެޑްމިން ސެކްޝަން ގައި އޮންނާނެކަމަށެވެ. އަދި މި މަސައްކަތް ކޮށްދޭން ބޭނުންވާ ފަރާތްތަކުން ބީލަން ހުށައަޅަންޖެހޭނީ 16 ޑިސެމްބަރުގެ 11:00 ގައިކަމަށް ސިޓީ ކައުސިލުން ބުނެއެވެ.
މާލޭ ސިޓީ ކައުންސިލުން ބުނީ މި މަސައްކަތް ކުރަން އަގު ހުށަހެޅުމުގައި ބައިވެރިވެވޭނީ ދިވެހި ކުންފުނި، ޕާޓްނާޝިޕް، ލޯކަލް އިންވެސްޓްމެންޓް ، އަދި ވިޔަފާރިކުރުމުގެ ހުއްދަ ލިބިފައިވާ ފަރާތްތަކަށްކަމަށެވެ.
