އެޕްސްޓީންގެ މުޑުދާރު، ނަޖިސް އަމަލުތައް ވަހީދަށް އެނގޭ ކަމަށް ތުހުމަތު ކުރެވެ އެވެ. އަދި އެޕްސްޓީން އާއެކު ރާއްޖޭގައި ރަށެއް ތަރައްގީކުރަން މަސައްކަތް ކުރި ކަމާއި ރިޔާސީ ކެމްޕޭންއަށް އޭނާ މެދުވެރިވެގެން ފައިސާ ހޯދަން މަސައްކަތް ކުރިކަން ވެސް ފަޅާ އަރާފައިވެ އެވެ.
އެޕްސްޓީންއެކު ވަހީދު ބޭއްވި ގާތް ގުޅުމާ ގުޅިގެން އާންމުންގެ ފާޑުކިޔުން އަމާޒުވާން ފެށުމުން ވެސް މުއިއްޒު އޭނާ ވަގާމުން ވަކިނުކޮށް ހުއްޓައި، އެންމެ ފަހުން އޭނާ އަމިއްލަ އަށް އިސްތިއުފާ ދެއްވި އެވެ.
ވަހީދުގެ މައްސަލައާ ގުޅޭ ގޮތުން ނޫސްވެރިޔަކު ހޯމް މިނިސްޓަރު އަލީ އިހުސާންއާ ސުވާލުކުރުމުން ވިދާޅުވީ އެޕްސްޓީން ފައިލްސްއާ ގުޅޭ އެއްވެސް މައްސަލައެއް ފުލުހުންނަށް ހުށަހަޅާފައިނުވާ ކަމަށެވެ. އަދި އަމިއްލައަށް ފެނިގެން ވެސް އެފަދަ މައްސަލައެއް ބަލަމުން ނުދާ ކަމަށް ވިދާޅުވި އެވެ.
އެމެރިކާގެ ޖަސްޓިސް ޑިޕާޓްމަންޓުން ހާމަކޮށްފައިވާ އެޕްސްޓީންގެ އީމެއިލް އަދި އެސްއެމްއެސް މުއާމަލާތްތަކުން އެނގޭ ގޮތުގައ އެޕްސްޓީންއާ ދެ ފަހަރެއްގެ މަތިން ވަހީދު ބައްދަލުކުރައްވާފައޮވެ އެވެ. އަދި ރާއްޖޭގެ ރަށްތަކެއް ވިއްކާލަން ހުށަހެޅުމާއި ފޮތަކަށް ފަންޑް ހޯދަން ވެސް އެޕްސްޓީން އަށް ހުށަހަޅާފައިވާ ކަމަށް ބުނެފައިވެ އެވެ.
