އޭސީސީގެ ދެ މެމްބަރެއގެ މަގާމު ވަނީ ހުސްވެފައެވެ
ރައީސް އޮފީހުން ބުނީ އެންޓި ކޮރަޕްޝަން ކޮމިޝަނުގެ ދެ މެމްބަރުން އިސްތިއުފާ ހުށަހަޅުއްވާފައިވާތީ، ހުސްވެފައިވާ ދެ މަގާމަށް ކުރިމަތިލުމުގެ ފުރުސަތު މިއަދުން ފެށިގެން 16 ޑިސެންބަރުގެ 12:00 ގެ ނިޔަލަށް ހުޅުވާލައިފައިވާކަމަށެވެ. އެހެންކަމުން މެމްބަރުކަމަށް ކުރިމަތިލުމަށް އެދޭ ފޯމާއި، އިޤްރާރާއި ކުށާއި ދަރަނީގެ ރެކޯޑް ފޯމާއި، ސިޔާސީ ޕާޓީއެއްގައި ރަޖިސްޓަރީ ވެފައިވޭތޯ ބެލުމަށް އިލެކްޝަންސް ކޮމިޝަނުން ސާފުކުރަންޖެހޭ ފޯމު ހުށައެޅުމަށް ވަނީ ހުޅުވާލާފައެވެ.
އޭސީސީގެ މެމްބަރުކަމުން އިސްތިއުފާ ދެއްވާފައިވަނީ ނައިބު ރައީސް އަބްދުއްސަލާމާއި މެމްބަރު ތާހާ މުހައްމަދު އެވެ. މި ދެ މެމްބަރުން އިސްތިއުފާދެއްވީ މި މެމްބަރުންނާއި ގުޅިގެން ހުށައެޅި ސުލޫކީ މައްސަލަތަކެއް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ބަލާ އެ މެމްބަރުން ވަކިކުރަން ނިންމާފައި ވަނިކޮށެވެ.
މިނިވަން މުއައްސަސާތަކުގެ ކޮމިޓީން ބުނީ އޭސީސީގެ ގާނޫނުގައި އެ ކޮމިޝަނުގެ ވާޖިބު އަދާކުރުމުގައި މެންބަރުން ބިރަކަށް ނުވަތަ ނުފޫޒަކަށް ލެނބިގެން ނުވާނެ ކަމަށާއި އަމިއްލަ މަސްލަހަތު ހާސިލު ކޮށްގެން ނުވާނެ ކަމަށް ބަޔާންކޮށްފައިވާ މާއްދާތަކާ އެ ދެ މެންބަރުން ހިލާފުވެފައިވާ ކަމަށެވެ.
އެހެންނަމަވެސް މަގާމުން އިސްތިއުފާ ދެއްވާ އަބްދުއްސަލާމާއި ތާހާ މުހައްމަދު ފޮނުއްވި ސިޓީގައި ވަނީ މެމްބަރެއްގެ ގޮތުން ޒިންމާތައް އަދާކުރީ މިނިވަންކަމާއި ނަޒާހަތްތެރިކަމާ އެކު ގާނޫނުއަސާސީ އަދި ގާނޫނުގައި ބުނާގޮތަށް ތެދުވެރިކަމާއި އިހްލާސްތެރިކަމާ އެކުކަމަށެވެ. އަދި އެ މެމްބަރުންނަށް އުފުލާފައިވަނީ އެއްވެސް އަސާސެއް ނެތް ތުހުމަތުތަކެއް ކަމަށެވެ.
