ބައްސާމްގެ މައްޗަށް ހައެއްކަ މައްސަލައިގެ ދައުވާ އުފުލާފައިވާއިރު، މިއަދު ކްރިމިނަލް ކޯޓުގައި އޮތީ ބައްސާމްގެ މައްޗަށް ދައުލަތުން އުފުލާފައިވާ މަނީ ލޯންޑަރިންގެ މައްސަލައަކާއި ހިޔާނާތްތެރިވުމުގެ މައްސަލައެކެވެ.
އޭގެ ތެރެއިން ފީފާއިން އެފްއޭއެމްއަށް ޖަމާކުރި 10،000 ޑޮލަރު ބައްސާމްގެ އެކައުންޓަށް ޖަމާކޮށް، އެ ފައިސާ ބޭނުންކުރި ކަމަށް ބުނާ މައްސަލާގައި އޭނާގެ މައްޗަށް ކުރާ ދައުވާތަކަށް އެނާގެ ފަރާތުން ކޯޓުގައި މިއަދުވަނީ އިންކާރުކޮށްފައެވެ. ބައްސާމްގެ ވަކީލް، އަލީ ނަދީމް ވިދާޅުވީ، ދެ ދައުވާއަށް ވެސް ބައްސާމް އިންކާރުކުރައްވާ ކަމަށެވެ. އިންކާރު ކުރައްވާ ސަބަބަކީ ދައުވާގައި ބުނާ ކަންކަމަކީ އެ ގޮތަށް ހިނގާފައިވާ ކަންކަމަށް ނުވާތީ ކަމަށް ވަކީލު ވިދާޅުވި އެވެ. ނަދީމްއަކީ ބައްސާމް ކުރިން އައްޔަން ކުރި ދެ ވަކީލުންވެސް މައްސަލަ ދޫކޮށްލުމުން، ބައްސާމް އައްޔަން ކުރި ތިންވަނަ ވަކީލެވެ.
ވަކީލު އަލީ ނަދީމް ފުރަތަމަ އެދިވަޑައިގަތީ ލިޔެކިޔުންތައް ދިރާސާކުރަން އޭނާއަށް ފުރުސަތު ދެއްވުމަށެވެ. ނަމަވެސް ކުރިން ވެސް މިފަދަ ގިނަ ފުރުސަތުތަކެއް ދިފާއަށް ދެވިފައިވާތީ ފުރުސަތު ނުދެއްވުމަށް، މައްސަލަ ބައްލަވާ ގާޒީ އިސްމާއީލް ޝަފީއު ނިންމެވި އެވެ. ބައްސާމްގެ އެކައުންޓަށް ފައިސާ ޖަމާކޮށްފައިވަނީ "ސޭލްސް އޮފް ޑޮލާސް" ނުވަތަ ޑޮލަރު ގަނެގެން ޖަމާކުރި ޑޮލަރު ކަމަށް އޮންނާތީ އެކަމާ ގުޅޭ ތަފުސީލު ދެއްވުމަށް ގާޒީ ސުވާލު ކުރެއްވި އެވެ. ނަމަވެސް ލިޔެކިޔުންތައް ދިރާސާނުކޮށް އެއަށް ޖަވާބު ދެއްވަން ދަތި ކަމަށް ވިދާޅުވެ ދިފާއީ ވަކީލު އެ ސުވާލަށް ޖަވާބެއް ނުދެއްވަ އެވެ.
މިއަދުގެ އަޑުއެހުން ނިންމައިލީ ދިފާއީ ހެކި ހުށަހެޅުމަށާއި ޝަރީއަތުގެ ކުރިން ހުށަހަޅާ ހުށަހެޅުންތައް ހުށަހެޅުމަށް 10 ދުވަހުގެ ފުރުސަތެއް ދިފާއަށް ގާޒީ ދެއްވުމަށް ފަހުގަ އެވެ.
ބޭރުގެ އިދާރާތަކުން ދޭ އެއްވެސް ފައިސާއަކަށް ހިޔާނަތްތެރިވެފައި ނުވާނެ ކަމަށް ބައްސާމް ކުރިންވެސްވަނީ ވިދާޅުވެފައެވެ. ބައްސާމް އެފްއޭއެމްގެ ރައީސްކަމުގައި ހުންނެވިއިރު، ވިދާޅުވީ އެފްއޭއެމްގެ އެއްވެސް ފައިސާއަކަށް އެ އިދާރާގެ ވެރިޔަކުވެސް އަދި މުވައްޒަފަކުވެސް ހިޔާނަތްތެރިވެފައި ނުވާނެ ކަމަށެވެ. އެފްއޭއެމް މާލީ ގޮތުން އިންތިހާއަށް ދަތިވެފައިވީނަމަވެސް ފައިސާއަށް ހިޔާނަތްތެރިވެފައި ނުވާނެ ކަމަށާއި އަދި ކުރެވޭ ތުހުމަތުތަކަށް ކެރިގެން ކުރިމަތިލާނެ ކަމަށް އޭރު ބައްސާމް ވިދާޅުވިއެވެ.
