މި އަހަރުގެ ޖެނުއަރީ މަހު ރައީސް ޑރ. މުހައްމަދު މުއިއްޒު ވަނީ އާސަންދައިގެ ހިދުމަތް ތައިލެންޑާއި ޔޫއޭއީއަށް ފުޅާކުރައްވާނެ ކަމަށް އިއުލާންކުރައްވާފަ އެވެ. އަދި އެ ގައުމުތަކުގެ ހޮސްޕިޓަލްތަކަށް ދާ ބަލިމީހުންނަށް އެކޮމޮޑޭޝަން ހަރަދުތައް ވެސް އާސަންދައިން ކަވަރުކޮށްދޭނެ ކަމަށް ވިދާޅުވެފައިވެ އެވެ.
އެގޮތުން މިދިޔަ ނޮވެމްބަރު މަހު ރައްޔިތުންގެ މަޖިލީހުގެ އިޖުތިމާއީ ކޮމިޓީގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން އެންސްޕާގެ ސީއީއޯ ހީނާ ވަލީދު ވިދާޅުވީ، ރައީސް މުއިއްޒުގެ ވައުދުފުޅާ އެއްގޮތަށް އެ ދެ ގައުމުން އާސަންދައިގެ ހިދުމަތް ފޯރުކޮށްދިނުމަށް މަސައްކަތްތައް ކުރަމުންދާ ކަމަށެވެ.
މަޝްވަރާތަކަށްފަހު އާސަންދަ ކުންފުނިން މިއަދު ވަނީ ތައިލޭންޑްގެ 2 ހޮސްޕިޓަލް އަދި ދުބާއީ ގެ 1 ހޮސްޕިޓަލުން އާސަންދާގެ ހިދުމަތް ދިނުމަށް އެއްބަސްވުންތަކުގައި ސޮއިކޮށްފައެވެ.
އާސަންދައާއެކު އެއްބަސްވުން ވެވުނު 3 ހޮސްޕިޓަަލަކީ:
- ތައިލޭންޑްގެ ބޭންގްކޮކް ހޮސްޕިޓަލް
- ތައިލޭންޑްގެ ދަ ވޯލްޑް މެޑިކަލް ހޮސްޕިޓަލް
- ދުބާއީ ބުރްޖީލް މެޑިކަލް ސިޓީ
ފޮޓޯ: އާސަންދަ
ދާދި ފަހުން ރައީސް މުއިއްޒު މަތިވެރިއަށް ކުރެއްވި ދަތުރު ގައި އެމަނިކުފާނު ވަނީ ދިވެހި އެއްވެސް ރައްޔިތަކަށް ލިބޭ ސަބްސިޑީ، ޕެންޝަން އަދި އާސަންދަ ކުރިއަށް އޮތް ތަނުގައި ނުކަނޑާނެ ކަމަށް ވިދާޅުވެފައެވެ. ބައެއް މީހުން އާސަންދައިގެން ދަށުން 1000 ޕަސެންޓަށްވުރެ ބޮޑު ޕްރޮފިޓެއްގައި ނުހައްގު މަންފާ ހޯދުމަށް ބޭސް ވިއްކަމުންދާ ކަމަށް އެމަނިކުފާނު ވިދާޅުވިއެވެ. އަދި އެފަދަ ހަރަދުތައް ހުއްޓުވައި އާސަންދަ ރިފޯމްކުރާނެ ކަމަށްވެސް ރައީސް ވިދާޅުވި އެވެ.
