
ވަޒީރު އަހްމަދު ސިޔާމް އެކްސްގައި ކުރެއްވި ޕޯސްޓެއްގައި ވިދާޅުވީ ރައީސް ޑރ. މުހައްމަދު މުއިއްޒުގެ ވައުދުފުޅާއި އެއްގޮތަށް މަސްވެރިން ކިރުވި މަހަށް 48 ގަޑިއިރުގެ ތެރޭގައި ފުރަތަމަ ފަހަރަށް މިއަދު ފައިސާ ޖަމާކޮށްފައިވާކަމަށެވެ.
އެގޮތުން މިިދޔަ އާދިއްތަ ދުވަހު މަސްވެރިން މިފްކޯއަށް ކިރި މަހަށްވާ 2،045،823.37 ރުފިޔާ މިއަދު މިފްކޯއިން މަސްވެރިންނަށް ޖަމާކޮށްފައިވާކަމަށެވެ. އަދި މީ ވައުދާއި އެއްގޮތަށް ފައިސާ މަސްވެރިންނަށް ޖަމާކޮށްދިން ތާރީހީ ދުވަހެއްކަމަށް ޝިޔާމްް ވިދާޅުވިއެވެ.
ވަޒީރު ޝިޔާމް ވިދާޅުވީ މަސްވެރިންގެ އަދި މަސްވެރި ސިނާޢަތުގައި ހުރި ޒަމާންވީ ބޮޑެތި ގޮންޖެހުންތަކަށް ރައީސް ޑރ. މުއިއްޒު ގެންދަވަނީ ޖުމްލަ ހައްލުތަކެއް ހޯއްދަވައި ދެއްވަމުންކަމަށެވެ.
މާލެ އަތޮޅުގެ ބައެއް ރަށްރަށަށް މި ހަފްތާގަައި ރައީސް ޑރ. މުއިއްޒު ކުރެއްވި ދަތުރުފުޅުގައި އިއްޔެ ކ. ގާފަރު ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުން ރައީސް ވިދާޅުވީ، ބީއެމްއެލްގައި އެކައުންޓް ހުޅުވާފައިވާ މަސް ދޯނިތަކުން މަސް ކިރާތާ 48 ގަޑިއިރު ތެރޭ ފައިސާ ޖަމާކުރަން މިއަދުން ފެށިގެން ފައްޓަވާނެކަމަށެވެ. އަދި އެކަމަށް ބޭންކާއި އެކު އެއްބަސްވުމެއްގައި ސޮއިކޮށްފައިވާކަމަށް ރައީސް ވިދާޅުވިއެވެ.