
މަސްވެރިކަމާއި ކަނޑުގެ ވަސީލަތްތަކާބެހޭ މިނިސްޓަރު އަހުމަދު ޝިޔާމް ވިދާޅުވީ މި ފައިސާ އިންވެސްޓްކުރާނީ ދައުލަތުންނާއި ޕްރައިވެޓް ސެކްޓަރުން ކަމަށެވެ. އަދި މިކަމަށް ބޭނުންވާ ހުރިހާ ފައިސާއެއް ރައީސުލްޖުމްހޫރިއްޔާ ވަނީ ހަމަޖައްސަވާފައި ކަމަށް އޭނާ ވިދާޅުވި އެވެ.
މިނިސްޓަރު ޝިޔާމް ވިދާޅުވީ މިހާރު އެއްގަމުގައި ހުރި 4،200 ޓަނުގެ ސްޓޯރޭޖް ކެޕޭސިޓީ އަކީ އެކަށީގެންވާ މިންވަރެއް ނޫން ކަމަށެވެ. އެހެންކަމުން ކުރިއަށް އޮތް ދޮޅު އަހަރާއި ދެ އަހަރާ ދެމެދުގެ މުއްދަތެއްގައި ކަނޑުމަތީގެ ބޯޓުތަކާއި އެއްގަމުގެ ސްޓޯރޭޖް އެއްކޮށްލައިގެން މިހާރު ހުރި 8،000 ޓަނުގެ ސްޓޯރޭޖް 25،000 ޓަނަށް އިތުރުކުރާނެ ކަމަށް އޭނާ ވިދާޅުވި އެވެ.
މަސްވެރިކަމުގެ ސިނާއަތު ކުރިއެރުވުމަށް ސަރުކާރުން އެންމެ އިސްކަންދެނީ މަސްވެރިން ކިރުވާ މަހަށް އަވަހަށް ފައިސާ ދިނުމާއި، މަސްވެރިންގެ ކަންބޮޑުވުންތަކަށް ހައްލު ހޯދައިދިނުމަށް ކަމަށް މިނިސްޓަރު ވިދާޅުވި އެވެ. އަދި މަހުގެ އެކި ބާވަތްތައް އެކްސްޕޯޓްކުރާނެ އިތުރު މާކެޓްތައް ހޯދުމަކީ ވެސް ސަރުކާރުން އިސްކަންދޭ ކަމެއް ކަމަށް އޭނާ ވިދާޅުވި އެވެ.