ހެލްތު މިނިސްޓްރީގެ އެންގުމަށް ފަޒީލާ އުސްމާން ހިންގަމުން ދިޔަ ހިޖާމާ ކުލިނިކް ފުލުހުން ގޮސް ބަންދުކުރީ މިދިޔަ ސެޕްޓެމްބަރުމަހުގެ ތެރޭގައެވެ.
ހެލްތުން ބުނީ އެތަން ބަންދުކުރަން ފުލުހުންނަށް އެންގީ ހުއްދަނެތި ހިޖާމާ ޖެހުމުގެ މަސައްކަތް ކުރާތީ އެކަން އެގޮތަށް ނުކުރުމަށް ތަކުރާރުކޮށް އެންގުމުންވެސް އެކަމަށް އިޖާބަ ނުދިނުމުންކަމަށެވެ.
ފަޒީލާ ވަނީ މި ސިވިލް ކޯޓަށް ޖުޑީޝަލް ރިވިއުއަށް ހުށައަޅާފައެވެ. އޭނާ ހުށައެޅި މައްސަލާގައި ބުނެފައިވަނީ ހިޖާމާގެ ހިދުމަތް ހުއްޓާލަން ސިއްހީ ހިދުމަތް ދިނުމުގެ ގާނޫނާއި ސިއްހީ ހިދުމަތުގެ ފަންނީ މަސައްކަތްތެރިންގެ ގާނޫނުގެ ދަށުން މިނިސްޓްރީން އަންގާފައިވާ އެންގުމަކީ ގާނޫނާ އެއްގޮތަށް އެންގި އެންގުމެއް ނޫން ކަމަށެވެ.
ހެލްތު މިނިސްޓްރީން އެދިގެން ފުލުހުން އެންގި އެންގުމަކީވެސް ގާނޫނީ އިމުގެ ތެރޭގައި އޮތް އެންގުމެއް ނޫން ކަމަށް ފަޒީލާ ހުށައެޅި މައްސަލާގައި ބުނެފައިވެއެވެ.
މި މައްސަލާގަައި ފަޒީލާ ވަނީ ހިޖާމާގެ ހިދުމަތަކީ ހުއްދަ ނަގައިގެން ކުރަން ޖެހޭ މަސައްކަތެއް ނޫން ކަމަށް ކަނޑައަޅައިދިނުން އެދިފައެވެ. އަދި ހިޖާމާގެ ހިދުމަތަކީ ހުއްދަ ނަގަން ޖެހޭ ހިދުމަތެއް ކަމަށް ޝަރީއަތަށް ގަބޫލު ކުރެވޭ ނަމަ، އެ ހުއްދަ ނުދީ ހިފެހެއްޓުމުގައި މިނިސްޓްރީން އަމަލުކުރީ ގާނޫނު އެއްގޮތަށް ނޫން ކަމަށް ކަނޑައަޅައި ދިނުމަށްވެސް ވަނީ އެދިފައެވެ.
މީގެއިތުރުން މިނިސްޓްރީ އާއި ފުލުހުން އަމަލުކުރި ގޮތުން އޭނާގެ ނަމާއި ކުރަމުންދިޔަ މަސައްކަތަށް ލިބުނު ގެއްލުމުގެ ބަދަލު ހޯދުމުގެ ހައްގު އޮތް ކަމަށް ކަނޑައަޅައިދިނުންވެސް ފަޒީލާ ހުށައެޅި މައްސަލާގައި ވަނީ އެދިފައެވެ.
