ފިޝަރީޒް މިނިސްޓްރީން ބުނީ މި ގަވާއިދުގެ ދަށުން މަސްވެރިކަމުގެ ދަފުތަރުގައި ރަޖިސްޓަރީ ކުރަން އެދޭ ފަރާތްތަކުން "ކެޔޮޅު" އެޕްލިކޭޝަން މެދުވެރިކޮށް ހުށަހަޅަން ޖެހޭނެ ކަމަށެވެ. އަދި އުޅަނދުގެ ވެރިފަރާތް ނުވަތަ އޮޕަރޭޓަރު ރަޖިސްޓަރީ ވުމަށްފަހު، ކެޔޮޅާއި ބިދޭސީން ހިމެނޭ ގޮތަށް ހުރިހާ ފަޅުވެރިން ވެސް ރަޖިސްޓަރީ ވާން ޖެހޭނެ ކަމަށް އެ މިނިސްޓްރީން ބުންޏެވެ.
މި ގަވާއިދުގެ މައިގަނޑު މަގުސަދަކީ މަސްވެރިންނާއި ފަޅުވެރިންނާއި އޮޑިވެރިންނާއި އޮޑިދޯނިފަހަރުގެ މައުލޫމާތު ހިމެނޭ ދަފުތަރެއް އެކުލަވާލައި، އެ ފަރާތްތަކަށް އިޖުތިމާއީ ރައްކާތެރިކަން ކަށަވަރުކޮށްދީ، އެ ފަރާތްތަކަކީ ދައުލަތް ދަންނަ ބަޔަކަށް ހެދުމެވެ.
މި ގަވާއިދަށް އަމަލުކުރަން ފެށުމަށްފަހު، ފިޝަރީޒް މިނިސްޓްރީން މަސްވެރިންނަށް އަމާޒުކޮށް ދޭ ޚިދުމަތްތައް ލިބޭނީ ހަމައެކަނި ދަފުތަރުގައި ރަޖިސްޓަރީ ވެފައިވާ ފަރާތްތަކަށެވެ. އަދި މަސްވެރިކަމުގެ ދަފުތަރުގައި ރަޖިސްޓަރީ ކޮށްފައިވާ ފަރާތްތަކަށް މާލީ އަދި އިޖުތިމާއީ ޚިދުމަތްތައް ފަސޭހަކަމާއެކު ހޯދޭނެ އިންތިޒާމު ހަމަޖައްސަން ޖެހޭނެ ކަމަށް ގަވާއިދުގައި ބަޔާންކޮށްފައި ވެއެވެ.
މި ދަފުތަރު އެކުލަވާލުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުތަކުގެ ތެރޭގައި ހިމެނޭ ކަމެކެވެ.
