މަގޫދޫ ކައުންސިލެގް ދައުވަތަކަށް ރައީސް ސާލިހް އެރަށަށް ވަޑައިހަތީ އިއްޔެ ހަވީރުގެ ވަގުތެއްގައެވެ. އެމަނިކުފާނު އެރަށަށް ވަޑައިގަތުމުން ރަށު ރައްޔިތުން ވަނީ ހޫނު މަރުހަބާއެއް ކިޔާފައެވެ.
ރައީސް ސާލިހަށް ފ. މަގޫދޫވަނީ ހޫނު މަރުހަބާއެއް ކިޔާފައި
މަގޫދޫގައި ރޭ ބޭއްވި ހާއްސަ ރަސްމިއްޔާތެއްގައި ރައީސް ސާލިހް ވަނީ މަގޫދޫ ރަސްމީ ފާލަމާއި އެ ރަށު ދަތުރުވެރިންގެ ހިޔާ އާއި ލައިސަންސް ޓްރެކް ރަސްމީކޮށް ހުޅުވާދެއްވާފައެވެ. މި ހުރިހާ ތަންތަނަކީ މަގޫދޫ ކައުންސިލުގެ ބަޖެޓުން ހަރަދުކޮށްގެން ތަރައްގީކޮށްްފައިވާ ތަންތަނެވެ.
ރައީސް ސާލިހަށް މަގޫދޫން މަރުހަބާ ކިޔަން ނުކުމެ ތިބި ރައްޔިތުން
މަގޫދޫ ކައުންސިލް އިން ތަރައްގީ ކޮށްފައިވާ ބައެއް ތަންތަން ރައީސް ސާލިހު ރޭ ރަސްމީކޮށް ހުޅުވައި ދެއްވާފައިވާއިރު، މިދިޔަ ވެރިކަމުގައި ރައީސް ސާލިހް ވަނީ އެރަށުގައި ތަރައްގީގެ މުހިއްމު މަޝްރޫއުތަކެއް ހިންގަވާފައެވެ.
އެގޮތުން އެރަށުގައި ފެނާއި ނަރުދަމާ ގާއިމުކުރުމުގެ މަސައްކަތް ވަނީ ނިންމާފައެވެ. އަދި މީގެއިތުރުން އައުޓްޑޯ ވޮލީ ކޯޓަކާއި، ކުޑަ ކުދިންގެ ޕާކެެއްވެސް ވަނީ ހަދާފައެވެ.
މަގޫދޫން މަރުހަބާ ކިޔަން ނުކުތް ރައްޔިތުންނާއި ރަައީސް ސާލިހް ސަލާމް ކުރައްވަނީ
މީގެއިތުރުން މަގޫދޫ އެއާޕޯޓް ގާއިމުކުރުމުގެ މަސައްކަތް ފަށާ އެ މަސައްކަތުގެ ބޮޑު ބައެއްވެސް މިދިޔަ ސަރުކާރުން އޮތީ ނިންމާފައެވެ. އެހެންނަމަވެސް މި ސަރުކާރުން ވަނީ އެ މަސައްކަތް މަޑުޖައްސާލާ އެރަށާއި އިންވެގެން އޮތް ނިލަންދޫގައި އެއާޕޯޓް އެޅުމުގެ މަސައްކަތް ފަށާފައެވެ.
