ހުޅުމާލޭ ރުއްގަނޑު ސަރަހައްދުގައި މިއަދު ހަވީރު ފެށުނު މުޒާހަރާގައި ޓެކްސީ ޑްރައިވަރުން ވަނީ ސަރުކާރުގެ ޓެކްސީ ފްލީޓު ވުޖޫދަށް ގެނައުމުން އޭގެ ސީދާ ގެއްލުން ޑްރައިވަރުންނާއި ޓެކްސީ ސެންޓަރުތަކާއި ގަރާޖުތަކަށް ކުރާނެ ކަމަށް ބުނެފަ އެވެ.
މި މުޒާހަރާ ވަނީ މިރޭވެސް ކުރިއަށް ގެންގޮސްފައެވެ. އަދި ދެ މީހުން ހައްޔަރުކުރީ މިރެއެވެ.
މުޒާހަރާގައި ބައިވެރިވި ޑްރައިވަރުން ބުނީ ޓްރާންސްޕޯޓު މިނިސްޓަރު އަމީނާ އާ ބައްދަލުކުރި ނަމަވެސް އެއްވެސް ހައްލެއް ލިބިފައި ނުވާ ކަމަށެވެ. އަދި ރައީސް މުހައްމަދު މުއިއްޒު އާ ބައްދަލުކުރަން އެދުމުން އެ ބައްދަލުވުން ކުއްލިގޮތަކަށް ކެންސަލްކޮށްލި ކަމަށް ވެސް ބުނެފަ އެވެ.
މި އިހުތިޖާޖުގައި ޑްރައިވަރުން އެދެނީ ސަރުކާރުގެ ޓެކްސީ ފްލީޓު ވުޖޫދަށް ނުގެނައުމަށާއި، ވޭން ދަތުރުގެ އަގުތައް ކުރިން އޮތް ގޮތަށް ބަދަލުކުރުމަށާއި، މާލެ އަދި އެއަޕޯޓުގެ ޓްރެފިކް ފްލޯ ފަސޭހަވާނެ ގޮތަށް ހެދުމަށެވެ. އަދި ޓެކްސީ ޑްރައިވަރުންގެ ދަފްތަރު އަލުން ހުޅުވައިލުމަށާއި މާލޭގައި ޕާކު ކުރެވޭނެ ނިޒާމެއް ގާއިމްކުރުމަށް ވެސް ގޮވާލައިފަ އެވެ.
