ޑިމޮކްރެޓްސްގެ ކަންމަތީ ބައްދަލުވުމުގައި ވާހަކަދައްކަވަމުން އިމްތިޔާޒް ވިދާޅުވީ، އަލިފާން ނިއްވުމަށް ގިނަ ވަގުތު ހޭދަވި ސަބަބާ މެދު ސުވާލު އުފެދޭ ކަމަށާއި އެކަން ތަހުގީގު ކުރަން ޖެހޭ ކަމަށެވެ. އަދި އިމާރާތް ކުރުމުގެ އުސޫލުތައް ހަދަން އޮތް އިދާރާގެ އިމާރާތަށް މިފަދަ ކަމެއް ދިމާވުމުން އެ މަސައްކަތްތައް ކުރެވޭ މިންވަރާ މެދު ސުވާލު އުފެދޭ ކަމަށް އޭނާ ވިދާޅުވި އެވެ.
ހެނދުނު 7:30 ހާއިރު ރޯވި އަލިފާން ނިއްވުމަށް ގާތްގަނޑަކަށް ހަތަރު ގަޑިއިރު ވަނީ ހޭދަވެފަ އެވެ. އަލިފާނުގެ ސަބަބުން ހައުސިންގ މިނިސްޓްރީ އާއި، އެންވަޔަންމަންޓް މިނިސްޓްރީ އާއި މިހާރު އުވާލާފައިވާ މޯލްޑިވްސް ލޭންޑް އެންޑް ސާވޭ އޮތޯރިޓީ ހިނގި ބައި އަދި މާލޭ ސިޓީ ކައުންސިލުގެ މުހިންމު އޮފީހެއް ވަނީ އަނދައިގެން ގޮސްފަ އެވެ.
އިމްތިޔާޒް އިތުރަށް ވިދާޅުވީ ގާނޫނުއަސާސީގެ ދިފާއުގައި ނުކުންނަން ޖެހެނީ މިފަދަ ކަންކަން ވެގެންދާއިރު ޖަވާބުދާރީ ކުރުވުމަށް ކަމަށާއި، ގާނޫނުއަސާސީ ނެތި އެފަދަ އެއްވެސް ކަމަކަށް ޖަވާބުދާރީ ނުކުރެވޭނެ ކަމަށެވެ.
