ހައުސިން މިނިސްޓްރީއާ އިންފްރާސްރަކްޗަރު މިނިސްޓްރީ ހިންގަމުން އަންނަ އިމާރަތުގައި މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގައި އެތަނާއި އިންވެގެން ހރި އެންވަރަމެންޓް މިނިސްޓްރީއާއި މާލޭ ސިޓި ކައުންސިލްގެ ވައިޓަލް ސެކްޝަނާއި ލޭންޑް ސެކްޝަން ހިންގަމުންއައި އިމާރާތަށްވެސް ވަނީ ގެއްލުން ލިބިފައެވެ.
އަލިފާނުގައި ގެއްލުންވި ކައުންސިލްގެ އިމާރާތަކީ މާލޭ ރައްޔިތުންގެ އުފަންވުމާއި މަރުގެ ރެޖިސްޓްރޭޝަންތަކުގެ އިތުރުން ރަށްވެހިކަމާއި ގޯތިތަކުގެ ރެޖިސްޓްރޭޝަން ފަދަ ތަކެތީގެ އަސްލު ބަހައްޓާފައި ހުންނަ ތަނެނެވެ. އަލިފާނުގެ ހާދިސާގައި އެމްއެންޑީއެފްގެ އޮފިސަރުންނާއި ކައުންސިލުގެ މުވައްޒަފުން ކުރި ބުރަ މަސައްކަތުން އެ ތަނުގައި ހުރި ވަރަށް ގިނަ އަދަދެއްގެ ލިޔެކިޔުންތަކާއި މުދާ ނެރެ ސަލާމަތްކުރެވުނެއެވެ.
އަލިފާނުގެ ހާދިސާއާ ގުޅިގެން މާލޭ ސިޓީ ކައުންސިލުން ވަނީ ކުއްލި ބައްދަލުވުމެއް ބާއްވާފައެވެ. މި ބައްދަލވުމުގައި މޭޔަރު އާދަމް އާޒިމް ވަނީ އަލިފާނުގެ ހާދިސާގައި ލިބުނު ގެއްލުންތަކުން އަރައިގަތުމަށް 4.5 މިލިއަން ރުފިޔާގެ ބަޖެޓް ހުށައަޅާފައެވެ. ކައުންސިލްގެ ބައްދަލުވުމުން ވަނީ މި ބަޖެޓް ފާސްކޮށްފައެވެ.
މި ބަޖެޓް ބޭނުންކުރާނީ އޮފީސް ހިންގަން ބޭނުންވާ ސެޓެޕް ހެދުމާއި ތަނަށް ބޭނުންވާ ފަރުނީޗަރު ގަތުމަށްކަމަށެވެ. އެހެންނަމަވެސް ތަނެއް ކުއްޔަން ހިފަން ޖެހިއްޖެނަމަ އެކަމަށްވެސް ބަޖެޓުން ހަރަކުކުރާނެކަން އާޒިމް ފާހަގަކުރެއްވިއެވެ.
މި ޖަލްސާގައި ވާހަކަ ދައްކަވަމުން އާޒިމް ވިދާޅުވީ ކައުންސިލްގެ ރެޖިސްޓްރޭޝަން އޮފީސް ހިންގަނެ ތަނެއް ހަމަޖައްސާދިނުމަށް ލޯކަލް ގަވަމެންޓް އޮތޯރިޓީ (އެލްޖީއޭ) ގެ ސީއީއޯ އަހްމަދު ނިމާލަށް ދަންނަވާފައިވާކަމަށެވެ. އެހެންނަމަވެސް އެކަމުގައި ކުރިއެރުމެއް ލިބިފައި ނުވާ ކަމަށް އާޒިމް ވިދާޅުވިއެވެ.
