މާލޭ ޓީމުގައި ރަށުން ބޭރު ކުޅުންތެރިން ހިމެނޭ އަދަދަށްވުރެ އިތުރަށް ކުޅުންތެރިން ހިމެނޭ ކަމަށް ބުނާ މައްސަލަ ފެންމަތިވެ، އާދިއްތަ ދުވަހު ހަވީރު މާލެއާ އަލިފުށި ކުޅެން އޮތް މެޗުވެސްވަނީ ފަސްކޮށްފައެވެ. މިހާރު އޮތް ގޮތުން މި މެޗުން ކުޅޭނީ ހޯމަ ދުވަހުއެވެ.
މައުލޫމާތު ލިބިފައިވާ ގޮތުގައި މާލޭ ޓީމުގެ މައްސަލަ ޖެއްސީ މާލެއާ އެއް ގްރޫޕެއްގައި ދެވަނަ ބުރުގައި ހިމެނޭ ޅ. ކުރެންދޫ ޓީމުންނެވެ. މުބާރާތުގެ ދެ ވަނަ ބުރުގައި މިދިޔަ ބުރާސްފަތި ދުވަހުގެ ރޭ، މާލެ ޓީމު އަތުން ކުރެންދޫ ވަނީ ބަލިވެފައެވެ. އެ މެޗަށް ފަހު، ކުރެންދޫ ކައުންސިލުން ވަނީ އެ މައްސަލަ ރަސްމީކޮށް ހުށަހަޅާފައި ކަމަށްވަނީ މައުލޫމާތު ލިބިފައެވެ.
ގޯލްޑް ކަޕް މުބާރާތުގެ ގަވައިދު ބުނާ ގޮތުން ރަށުން ބޭރު ދެ ކުޅުންތެރިން ޖެހުމުގެ ހުއްދަ ކޮންމެ ޓީމަކަށް ވެސް ލިބެ އެވެ. އެ ޖާގަ އަށް މާލެ އިން ރަޖިސްޓަރީ ކުރި ދެ ކުޅުންތެރިންނަކީ މިސްރުގެ މިޑްފީލްޑަރު ހަލީލް ޖަމާލާއި އަލީ މުނާޒެވެ.
އެކަމަކު ކުރެންދޫން ހުށަހެޅި މައްސަލައިގައި ބުނީ، މާލެ ޓީމުގެ އެހެން ދެ ކުޅުންތެރިއެއްގެ ވާހަކައެވެ. ކުރެންދުއާ ދެކޮޅަށް ކުޅުނު މެޗުގައި، އެ ދެ ކުޅުންތެރިން ވެސް ވަނީ ފުރަތަމަ 11 ގައި ހިމެނިގެން ކުޅެފަ އެވެ. ކުރެންދޫ ޓީމުން ކުރާ ތުހުމަތުތައް މާލޭ ޓީމުން ދޮގު ކުރެއެވެ.
މި މައްސަލަ ގޯލްޑް ކަޕް އިންތިޒާމް ކުރީ ނައިންޓީ ޕްލަސްގެ ޑިސިޕްލިނަރީ ކޮމިޓީން އަންނަނީ ބަލަމުންނެވެ.
