ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ މިނިސްޓަރު އާދަމް ޝަރީފް އުމަރު ވިދާޅުވީ މި މަޝްރޫއު ކުރިއަށް ގެންދިއުމަށް އިކޮނޮމިކް ކައުންސިލުން ވަނީ ހުއްދަ ދީފައި ކަމަށެވެ. އަދި މިހާރު އެޓަރނީ ޖެނެރަލްގެ އޮފީހުގައި އެއްބަސްވުމުގެ މަސައްކަތް ކުރަމުންދާ ކަމަށް އެ މިނިސްޓަރު ވިދާޅުވި އެވެ.
މިނިސްޓަރު ވިދާޅުވި ގޮތުގައި މި މަޝްރޫއަކީ ކޮންޓްރެކްޓަރު ފައިނޭންސް އުސޫލުން ކުރިއަށް ގެންދާ މަޝްރޫއެކެވެ. އަދި މި މަޝްރޫއުގެ އިތުރުން ޗައިނާ ސަރުކާރުގެ އެހީގައި އިތުރު 50 ކައުންސިލް އިމާރާތް އެޅުމަށްވެސް ވަނީ ނިންމައިފަ އެވެ.
ގިނަ ކައުންސިލް އިމާރާތްތައް މިހާރު ހުރީ ވަރަށް ދަށު ހާލަތުގައި ކަމަށާއި ބައެއް އިމާރާތްތައް ހުރީ ބޮލަށް ވެއްޓޭ ހާލަތުގައި ކަމަށް މިނިސްޓަރު ވިދާޅުވި އެވެ. އަދި މުޅި ރާއްޖޭގައި 187 އާ ކައުންސިލް އިމާރާތް އަޅަން ޖެހިފައިވާ ކަމަށް ދިރާސާތަކުން ދައްކާ ކަމަށް އެ މިނިސްޓަރު ވިދާޅުވި އެވެ.
