"އައި އެމް މޯލްޑިވްސް ރޯޑްޝޯ" ގެ ނަމުގައި އަޒަރުބައިޖާނުގެ ބާކޫގައި އާއި ޖޯޖިއާގެ ތިބިލީސީގައި ރާއްޖެ އިސްތިހާރު ކުރުމަށް، އެ ހަރަކާތް ބޭއްވުމުގެ މަގްސަދަކީ ރާއްޖޭގެ އާ މާކެޓް ތަކާ ދެމެދު ގުޅުން އިތުރަށް ވަރުގަދަ ކުރުން ކަމުގައި ގެސްޓް ހައުސް އެސޯސިއޭޝަނުން މައުލޫމާތުދެއެވެ.
ބަކޫގައާއި ތިބިލީސީގައި ބޭއްވި އެެ ރޯޑް ޝޯވްގައި 300 އަށްވުރެ ގިނަ އޮފިޝަލުން ބައިވެރިވިކަމަށްވެސް ގެސްޓް ހައުސް އެސޯސިއޭޝަނުން ބުނެއެވެ.
300 އަށް ވުރެ ގިނަ އޮފިޝަލުންގެ އިތުރުން ފަތުރުވެރިކަމުގެ ސިނާއަތުގެ އެކި ދާއިރާތައް ތަމްސީލުކުރާ 18 ކޯ އެގްޒިބިޓަރުންނާއެކު އުފެއްދުންތެރި ބީ2ބީ ނެޓްވޯކިން ސެޝަންތައް ބޭއްވި ކަމަށް ގެސްޓް ހައުސް އެސޯސިއޭޝަނުން ބުނެއެވެ.
ފޮޓޯ: އެންއެޗްޖީއެމް
މި ރޯޑްޝޯވްގައި ކުރިއަށް ގެންދިޔަ ހަރަކާތްކުގެ ތެރޭގައި އަޒަރުބައިޖާން އެއާލައިންސް އަދި އެއާ އަރަބިއާގެ ދަތުރުތަކާ ބެހޭ ޕްރެސެންޓޭޝަންގެ އިތުރުން ރަށްރަށުގެ ފަތުރުވެރިކަމުގެ އުފެއްދުންތައް ދައްކާލުން ހިމެނެއެވެ.
މި ހަރަކާތުގައި ރާއްޖޭގެ ފަތުރުވެރިކަމުގެ ދާއިރާގެ ފުއްނާބުއުސް ހޮޓާ، ގެސްޓްހައުސް އަދި ރިސޯޓުތަކުން ސްޕޮންސާކުރި 40 އަށްވުރެ ގިނަ ޗުއްޓީ ޕެކޭޖް ހިމެނުނު ކަމަށް ގެސްޓް ހައުސް އެސޯސިއޭޝަނުން ބުނެއެވެ. އަދި ރަށްފުށުގެ ފަތުރުވެރިކަން ކުރިއެރުވުމުގެ ގޮތުން ހުށަހަޅާފައިވާ އެ ޕެކޭޖްތަކުގެ އަގު 50،000 އެމެރިކާ ޑޮލަރަށް އަރާ ކަަމަށްވެސް އެ ފަރާތުން ބުނެއެވެ.
ސަރުކާރުގެ އަމަޒަކީ އަހަރުގެ ނިޔަލަށް 2 މިލިއަން ފަތުރުވެރިން ގެނައުމެއެވެ. އެގޮތުން އަހަރު ނިމެން ހަފްތާއަކަށް ކައިރިވެފައި ވަނިކޮށް މިހާތަނަށް 1.94 މިލއަން ފަތުރވެރިން ރާއްޖެއަށް ވަނީ ޒިއާރާތްކޮށްފައެވެ.
