ޒަމީރު މިހެން ވިދާޅުވެފައި މިވަނީ ބޭންކް ލޯން ނަގައިގެން ގަނެ، ކަސްޓަމް ޑިއުޓީ ދައްކާގެން އިމްޕޯޓްކުރި 4 ފުރޮޅުލީ އުޅަނދުތައް ގާނޫނީ ގޮތުން ނުދުއްވޭ ގޮތަށް މާލޭގެ ގިނަ އަދެއްގެ ރައްޔިތުން މާޔޫސްވެފައި ހުރިކަމަށް ފާހަގަަކޮށް އެކަމާ ގުޅޭގޮތުން ކަންބޮޑުވުން ފާޅުކުރައްވަމުންނެވެ. ޒަމީރު ވިދާޅުވިގޮތުގައި ރައްޔިތުންނަށް މިހާލަތު ކުރިމަތިވެފައި ވަނީ ޓްރާންސްޕޯޓް މިނިސްޓްރީން އެ ވެހިކަލްތައް ރަޖިސްޓްރީކުރެވޭނެ އުސޫލެއް ފަހިވެފައި ނެތުމުން ކަމަށެވެ.
މާލޭގައި ގިނައީ ހުސް ވަގުތުތަކުގައި ޓެކްސީގެ ހިދުމަތް ދީގެން އާމްދަނީ ލިބޭނެ ސެކަންޑަރީ ވަސީލަތެއް ހޯދަން މަސައްކަތްކުރާ މަސައްކަތްތެރިން ކަމަށާއި އެ މީހުން ބުނާގޮތުގައި ކުރިމަތިވެފައިވާ ދަތިތަކަކީ ސަރުކާރުތަކުގެ ދުރުވިސްނުމާއި ރޭވުންތެރިކަން ނެތުމުގެ ސަބަބުން ކުރިމަތިވި ކަމެއް ކަމަށް ޒަމީރު ވިދާޅުވި އެވެ.
އެމީހުން ވެހިކަލްތައް ގަންނަން ލޯނު ހޯދީ އުސޫލުތަކަށް ތަބާވެ އިމްޕޯޓް ޑިއުޓީ ދައްކައިގެން ކަމަށާއި މާޔޫސްވެފައި ތިބި ރައްޔިތުން މިހާރު ދަނީ ހިތާމަ ފާޅުކުރަމުން ކަމަށް އޭނާ ވިދާޅުވި އެވެ.
އެގޮތުން މިހާރު އެތެރެކޮށްފައި ހުރި އުޅަދުތައް ރަޖިސްޓްރޯކޮށްދީ، ވަގުތީގޮތުން އިމްޕޯޓްއަށް ހުއްޓުމެއް ގެންނަން ޖެހޭ ކަމަށާއި ގަރާޖް ނެތި ކެޕިޓަލް ސިޓީގައި ދުއްވަން އެތެރެކުރުމުގެ ހުއްދަ ހިފަހައްޓައި، ޒޯނިން ކަނޑައަޅާފައި ހުއްދަތަކެއްވެސް ދޭން ޖެހޭ ކަމަށް ޒަމީރު ވިދާޅުވި އެވެ.
މީގެ ކުރިން ޕާކިން ސްޓިކާއެއް ޖެހީމާ ފުދޭއިރު މިހާރު ޕާކްކުރާކަށް މާލެ ސިޓީގައި ޖާގަޔެއް ނެތް ކަމަށް އޭނާ ވިދާޅުވި އެވެ. އަދި ވަލުދޮރާށިން ސިޓީ ލިޔެ ނާޖާއިޒް ފީތައް ނަގާގެން 30،000ރ އާއި 50،000ރ އަދަކަށް ގަރާޖް ސިޓީ ވިއްކާފަ ހުރިކަން ފާހަގަކުރެވޭ ކަމަށް ޒަމީރު ވިދާޅުވި އެވެ. އަދި ފަހަކަށް އައިސް މި އަދަދު 150،000ރ އަރާފަވާކަމުގެ އަޑުތައް އިވެން ފަށާފައިވާކަމަށްވެސް ޒަމީރު ފާހަގަކުރެއްވި އެވެ.
ޒަމީރު ވިދާޅުވިގޮތުގައި އެފަދަ ކަމަކީ ވަރަށް ދެރަކޮށް ހިނގާ ކަންކަން ކަމަށާއި އެކަން ކަމަށް ނިޒާމުގެ ތެރޭން ހައްލު ނޫހޯދައިދެވޭނަމަ އެއީ ކޮރަޕްޝަނަށް މަގުފަހިވާން ހުޅުވާލެވޭ ދޮރަކަށް ވެގެންދާނެ ކަމަށް އެނާ ފާހަގަކުރި އެވެ. އަދި އެކަން މާޒީގައިވެސް ހިނގާފަ ވަނީވެސް ހަމަ އެއްގޮތަކަށް ކަމަށް ޒަމީރު ވިދާޅުވި އެވެ.
ވަގުތީ ގޮތުން ރަޖިސްޓްރީ ކުރުމުގެ ހުއްދަ އާއި ގާނޫނީ ގޮތުން އެތެރެކުރާ އުޅަނދުތަކަށް ހާއްސަ ޕާކިން ޒޯންތައް ހިމަނައިގެން ރައްޔިތުންނަށް ވަގުތީ ލުއިގޮތްތަކެއް ދިނުމަށް ޒަމީރު ވަނީ ގޮވާލާފަ އެވެ. އަދި ރަޖިސްޓްރީ ނުކުރާ އުޅަނދުތަކުން ކޮށްފައިވާ ބޮޑެތި ޖޫރިމަނާތައް އަލުން މުރާޖައާކޮށް، ރަޖިސްޓްރީ ކުރުމަށް މަގުފަހިކުރުމުގެ ގޮތުން މައާފު ދިނުމުގެ ޕްރޮގްރާމެއް ހިންގުމަކީ ވަރައް މުހިއްމުކަމެއް ކަމަށާއި ސަބަބަކީ އެތަކެތި އެތެރެކޮށް ޑިއުޓީ ދައްކާ އެތަކެތި އެތެރެކުރިފަރާތްތައް ސަރުކާރުގެ އުސޫލެއް ނެތުމުން ދަރާ ބިކަވަމުކީ އެރައްޔިތުންނަށް ދެވޭ ވަރަށް ބޮޑު އަނިޔާއަކަށް ވާތީ ކަމަށެވެ.
