މި އޭޓީއެމް ސެންޓަރާއެކު މި ތަނުން ތުލުސްދޫ ރައްޔިތުންނަަށް ފަސޭހަކަމާއެކު 24 ގަޑީރު ހުރިހާ ބޭންކިން ހިދުމަތެއް ލިބޭނެކަމަށް އެމްއައިބިން ބުނެއެވެ.
އޭޓީއެމް ސެންޓަރު އިފްތިތާހު ކުރުމުގެ ރަސްމިއްޔާތުގައި އެމްއައިބީގެ ޗީފް ޑިޖިޓަލް އޮފިސަރު އަރީފާ ރަޙްމާން ޗޯދަރީ އާއި ތުލުސްދޫ ރަށު ކައުންސިލްގެ ރައީސް އަދި ނައިބު ރައީސްވެސް ބައިވެރިވަޑައިގަތެވެ.
އަލަށް ތައާރަފްކުރި އޭޓީއެމްގައި ކޭޝް ޑިޕޮސިޓް އަދި ވިތުޑްރޯވަލް ފަންކްޝަންތައް ހިމެނޭ ގޮތަށް ގިނަ ހިދުމަތްތަކެއް ލިބިގެންދާނެކަމަށް އެމްއައިބީން ފާހަގަކުރެއެވެ.
އޭގެއިތުރުން ޒަމާނީ ބޭންކިން ބޭނުންތަކަށް ފަރުމާކޮށްފައިވާ މި މެޝިނަކީ ވިސާ އަދި މާސްޓަކާޑްގެ ހުރިހާ ޑެބިޓް އަދި ކްރެޑިޓް ކާޑަކާ ވެސް ގުޅޭ މެޝިނަކަށް ވާތީ، ދިވެހިންނާއި ފަތުރުވެރިންނަށް ވެސް އެއްވެސް ދަތިކަމެއް ނެތި ބޭންކިން ތަޖުރިބާ ލިބިގެން ދާނެކަަމަށް އެމްއައިބީން ބުނެއެވެ.
އެސެންޓަރު އިފްތިތާހުކުރުމުގެ ރަސްމިޔާތުގައި އެމްއައިބީގެ ޑިޖިޓަލް އޮފިސަރު އަރީފާ ރަޙްމާން ޗޯދަރީ ވަނީ މި ސެންޓަރު އިފްތިތާހު ކުރުމާމެދު އުފާ ފާޅުކުރައްވައި، ތުލުސްދޫ ފަދަ ރަށަކަށް އެމްއައިބީގެ ހިދުމަތްތަކުގެ ނެޓްވޯކް ފުޅާކުރުމުގެ މުހިންމުކަން ފާހަގަކުރައްވާފައެވެ.
އެނާ ފާހަގަކުރެއްވި ގޮތުގައި މި އާ އޭޓީއެމްއަކީ ރައްޔިތުންނަށް، ހާއްސަކޮށް ހިދުމަތް ނުލިބޭ ތަންތަނުގައި ތިބި މީހުންނަށް އިތުބާރު ހުރި، ރައްކާތެރި، އަދި ފަސޭހަ ބޭންކިން ހައްލުތައް ފޯރުކޮށްދިނުމަށް އެމްއައިބީން ކުރާ މަސައްކަތުގެ ބައެއްކަމަށް ވިދާޅުވިއެވެ.
އެމްއައިބީން މުޅި ރާއްޖޭގައި އޭޓީއެމް ނެޓްވޯކް ފުޅާވަމުންދާއިރު، މިއީ ޑިޖިޓަލް ބޭންކިންގެ އާ ހައްލުތައް ފޯރުކޮށްދިނުމާއި، މާލީ ހިމެނުން ކުރިއެރުވުމާއި، ބޭންކިން ހިދުމަތްތައް އެންމެންނަށް ލިބޭނެ ގޮތް ހެދުމަށް ބޭންކުން ކުރާ ހިދުމަތްތެރިކަން ދައްކުވައިދޭ ކަމެއްކަމަށް އެފަރާތުން ބުނެއެވެ.
