
"ފައްޓަމާ: އާއިލީ ހަވީރު" ގެ ނަމުގައި ހާއްސަ ހަވީރެއް ބާއްވާފައިވާއިރު މި ހަފްލާގައި ބައިވެރިވެ ވަޑައިގަތީ މިނިސްޓާ އޮފް ކްލައިމެޓް ޗޭންޖް އެންވަޔަރަންމަންޓް، އެންޑް އެނާޖީ ތޯރިގު އިބްރާހީމެވެ.
ވެމްކޯއިން އިންތިޒާމްކޮށްގެން ބޭއްވި މި ހަފްލާގައި، ގުރައިދޫގައި ވެމްކޯގެ ހިދުމަތް ފެށުމާ ގުޅޭ ގޮތުން މައުލޫމާތު ދެވުނެވެ. އަދި ރަށުގެ ކުނި މެނޭޖްކުރުމުގެ މުހިންމުކަމާއި، ތިމާވެށި ހިމާޔަތްކުރުމުގެ މުހިންމުކަން ފާހަގަކުރެވުނު ކަމަށް އެނަވަޔަރަމަންޓް މިނިސްޓްރީން ބުނެއެވެ.
މިނިސްޓަރު ތޯރިގް އިބްރާހީމް ވަނީ މި ހަފްލާގައި ވާހަކަފުޅު ދައްކަވައި، ގުރައިދޫގައި ވޭމްކޯގެ ހިދުމަތް ފެށުމަކީ ރަށުގެ ތިމާވެށި ރައްކާތެރިކުރުމަށް އެޅޭ މުހިންމު ފިޔަވަޅެއްކަމުގައި ވިދާޅުވެފައެވެ. އަދި ރަށުގެ ރައްޔިތުން މި ހިދުމަތް ބޭނުންކުރުމުގައި އެއްބާރުލުން ދިނުމުގެ މުހިންމުކަން މިނިސްޓަރު ފާހަގަކުރެއްވިއެވެ.
ގުރައިދޫގައި ވެމްކޯގެ ހިދުމަތް ފެށުމާއެކު، ރަށުގެ ކުނި އުކާލުމާއި މެނޭޖްކުރުމުގެ މަސައްކަތް ހަރުދަނާވެ، ރަށުގެ ސާފުތާހިރުކަން އިތުރުވެގެންދާނެ ކަމަށް އެންވަޔަރަމަންޓް މިނިސްޓްރީން އުންމީދު ކުރެއެވެ.