ގދ. ތިނަދޫގައި 10000 މީހުން ހަމަނުވާ ކަމަށް ބުނެ އެ ރަށަށް ދީފައިވާ ސިޓީގެ ދަރަޖަ ބާތިލުކުރަން ހައިކޯޓަށް މައްސަލައެއް ހުށަހެޅީ ކުރީގެ މެޖިސްޓްރޭޓް، އަދި މި ސަރުކާރުގައި ކުރިން ޑެޕިއުޓީ މިނިސްޓަރުކަމުގެ މަގާމުގައި ހުރި ވަކީލު، މުހައްމަދު ރާގިބުއެވެ.
ރައީސް އޮފީހާ ދެކޮޅަށް ހުށަހެޅި މި މައްސަލައާ ގުޅިގެން ޑެޕިއުޓީ މިނިސްޓަރުކަމުގެ މަގާމުން ރާގިބުވަނީ ވަކިވެސްކޮށްފައެވެ.
ރައީސް އޮފީހަށް ރައްދުވާ ގޮތަށް ދުސްތޫރީ މައްސަލައެއް ގާނޫނީ ވަކީލު މުހައްމަދު ރާގިބު އަހުމަދު ހުށަހެޅުއްވީ މިދިޔަ 21 ނޮވެމްބަރުގަ އެވެ. މި މައްސަލައިގައި ހައި ކޯޓުގެ ރަޖިސްޓްރާ މަރިޔަމް ހޫރުޝީދާގެ ނިންމެވުމުގައިވަނީ އެ މައްސަލައަކީ މަޖިލީހުގެ ގާނޫނުން ލިބޭ ބާރަކުން ރައީސް އިބްރާހީމް މުހައްމަދު ސޯލިހު ނެރުއްވި ގަރާރެއް ކަން ހުށަހެޅި މައްސަލައިގެ ލިޔުމުން ބުނެދެވިފައިނުވާ ކަމަށެވެ. އެކަމަށް ރިއާޔަތްކޮށް،. ރަޖިސްޓްރާ ނިންމެވީ އެ މައްސަލަ ބަލައި ނުގަންނާށެވެ.
ތިނަދުއަށް ސިޓީއެއްގެ ދަރަޖަ ދިނީ 31 އޮގަސްޓް 2023ގަ އެވެ. އެކަން ކުރީގެ ރައީސް އިބްރާހިމް މުހައްމަދު ސޯލިހު އިއުލާން ކުރެއްވީ އެ މަނިކުފާނުގެ ރިޔާސީ ކެމްޕެއިންގެ ތެރެއިން ތިނަދުއަށް ވަޑައިގެން ބޭއްވި ޕާޓީ ޖަލްސާއެއްގަ އެވެ.
ކުރު މުއްދަތެއްގެ ތެރޭގައި އެ ރަށުގެ އާބާދީ އެހާ އަވަހަށް އިތުރުކުރި ގޮތަކާ މެދު އޭރު ވެސް ގިނަ ބަޔަކު ދިޔައީ ސުވާލު އުފައްދަމުންނެވެ.
