ހަލީލް އެކްސްގައި ކުރެއްވި ޕޯސްޓެއްގައި ވިދާޅުވީ އެ މަނިކުފާނު އިންޑިއާއަށް ކުރައްވާ ދަތުރުފުޅުގައި، އެގައުމުގެ އެކްސްޓާނަލް އެފެއާސް މިނިސްޓަރު ޑރ. އެސް ޖައިޝަންކަރާ ބައްދަލުކުރައްވާނެ ކަމަށެވެ.
އެ ބައްދަލުވުމުގައި، ދެ ގައުމުން އިސްކަންދޭ ކަންތައްތަކާ ގުޅޭ ގޮތުންނާއި ދެގައުމާއި ރައްޔިތުންގެ ފައިދާއަށް ޓަކައި ގުޅުން ވަރުގަދަ ކުރުމަށް މަޝްވަރާކުރާނެ ކަމަށް އޭނާ ވިދާޅުވި އެވެ.
މިއީ އޭނާ ފޮރިން މިނިސްޓަރު ކަމާ ހަވާލުވެވަޑައިގަތުމަށް ފަހު އިންޑިއާއަށް ކުރެއްވި ފުރަތަމަ ރަސްމީ ދަތުރުފުޅެވެ.
ހަލީލް އިންޑިއާއަަށް ވަޑައިގެންނެވިއިރު، މިދިޔަ އަހަރުގެ އޮކްޓޯބަރު މަސް ތެރޭގައި ރައީސް ޑރ. މުހައްމަދު މުއިއްޒު އިންޑިއާއަށް ވަޑައިގެން ދެ ގައުމުގެ ގުޅުން އިތުރަަށް ބަދަހި ކުރުމާއި ގުޅޭގޮތުން މަޝްވަރާތަކެއް ކުރެއްވި އެވެ.
އެ ދަތުރުފުޅުގެ ތެރެއިން ބޮޑުވަޒީރު ނަރެންދުރަ މޯދީ އާ ބައްދަލު ކުރައްވައި ރަސްމީ މަޝްވަރާތައް ބާއްވަވާފައި ވެސް ވެއެވެ. އަދި އެއްބަސްވުންތަކުގައި ސޮއިވެސް ކުރައްވާފައިވެ އެވެ.
