ޗައިނާގެ ފޮރިން މިނިސްޓްރީން ހުކުރު ދުވަހު ބުނި ގޮތުގައި ހޮސްޕިޓަލްތަކަށް ބާރު ބޮޑުވެފައި ވިޔަސް މިފަހަރު ފިނިމޫސުމުގައި ރޯގާ ޖެހުނު މީހުންގެ އަދަދު ކުރީ އަހަރާ އަޅާބަލާއިރު މަދެވެ.
އެހެންވެ، ޗައިނާއަށް ދަތުރުކުރުމުގައި ނުރައްކަލެއް ނެތް ކަމަށް ފޮރިން މިނިސްޓްރީން ބުންޏެވެ.
މިހާރު ޗައިނާގައި ނޭވާލާ ނިޒާމުގެ ބަލިތައް އިތުރުވެ، އިމަޖެންސީ ހާލަތު ވެސް އިއުލާނުކޮށްފައިވާ ކަމަށް ބައެއް ފަރާތްތަކުން އަންނަނީ ބުނަމުންނެވެ.
އެ ވާހަކަތަކާ ގުޅިގެން އެޗްޕީއޭއިން ބުނީ، ޗައިނާގައި އިމަޖެންސީ ހާލަތު އިއުލާނުކޮށްފައިނުވާ ކަމަށެވެ. އަދި، މިދިޔަ އަހަރާ އަޅައިބަލާއިރު ޗައިނާގައި މި މޫސުމުގައި ނޭވާލާ ނިޒާމުގެ ބަލިތައް ފެންނަ މިންވަރާއި، ބަލީގައި ބޮޑު ވަރުވާ މީހުންގެ ނިސްބަތް މަދު ކަމަށް އެޗްޕީއޭއިން ބުންޏެވެ.
އެޗްޕީއޭއިން ބުނީ، މި ހާލަތު މޮނިޓާކުރަމުން އަންނަ ކަމަށެވެ.
މީގެ އިތުރުން، މިދުވަސްވަރަކީ ވަރަށް ގިނަ ބަޔަކު އުމްރާއިންނާއި އެކި ސަރަހައްދުތަކަށް ދަތުރުކުރުމަށް ފަހު އެނބުރި އަންނަ ދުވަސްވަރު ކަމުން، ނޭވާލާ ނިޒާމުގެ ބަލިތައް މިދުވަސްވަރު ރާއްޖޭގައި ވެސް އިތުރުވެދާނެ ކަމަށް ލަފާ ކުރެވޭތީ އެ ކަމަށް ސަމާލުވުމަށް އެ އިދާރާ އިން އިލްތިިމާސް ކުރެ އެވެ.
ދުނިޔޭގެ ބަލިމަޑުކަމެއްގެ ގޮތުގައި ބެލި ކޮވިޑް-19 ވެސް އެންމެ ފުރަތަމަ ފެތުރުނު ޗައިނާގައި ނޭވާލާ ނިޒާމުގެ ބަލިތައް ފެތުރެމުންދާއިރު، އެ ގައުމަކީ ރާއްޖެއަށް އެންމެ ގިނަ ފަތުރުވެރިން އަންނަ ގައުމެވެ. މިދިޔަ އަހަރު ވެސް އެ ގައުމުން 200،000އަށް ވުރެ ގިނަ ފަތުރުވެރިން ރާއްޖެ އައިސްފައިވެ އެވެ.
