ގަދަ ވިއްސާރާގައި ހުޅުމާލެ ސަހަރާގައި ފެންބޮޑުވެ، މީހުން ވަޅުލަން ދަތިވާ މައްސަލަ މިހާރު ވަރަށް ބޮޑެވެ. މީގެ ކުރިން ވެސް ތިން ފަހަރެއްގެ މަތިން ހަމަ މި މައްސަލަ ދިމާވެގެން އެ ސަހަރާގައި މީހުން ވަޅުލުން މެދުކަނޑާލި އެވެ.
މާލޭ ސިޓީ ކައުންސިލުން މިއަދު އެކްސްގައި ކުރި ޕޯސްޓެއްގައި ބުނީ ހުޅުމާލެ ސަހަރާގެ ފެންފަށަލާގައި، 8 އިންޗި އާއި 9 އިންޗިއާ ދެމެދު މިންވަރަށް ފެން ހަރުލާފައި ހުރުމުގެ ސަބަބުން ކަށްވަޅު ކޮނެ، ސަންދޯއް ބެހެއްޓުމަށް ދަތިވެފައިވާ ކަމަށެވެ.
އެހެންވެ، މި ވަގުތަށް ހުޅުމާލެ ސަހަރާގައި މީހުން ވަޅުލެވެން ނެތް ކަމަށް ސިޓީ ކައުންސިލުން ބުންޏެވެ. މި މައްސަލަ ހައްލުވަންދެން މީހުން ވަޅުލުން ކުރިއަށްދާނީ މާލޭ އާސަހަރާގައި ކަމަށެވެ.
މާލެ ސަރަހައްދަށް ވިއްސާރަކޮށް މޫސުން އޮތް ދުވަސްވަރަކަށް ވުމުން ހުޅުމާލެ ސަހަރާގައި މީހުން ވަޅުލަން ފަށާނީ މޫސުން އަލިވުމުން ކަމަށް ބެލެވެ އެވެ.
