ކަސްޓަމްސް އޮފިސަރުންތަކެއްގެ މައްޗަށް ތުހުމަތުކުރެވޭ ބޮޑު ޚިޔާނާތުގެ މައްސަލައެއް ފުލުހުން ތަހުގީގުކުރަން ފެށިކަން ހާމަވީ އިއްޔެ އެވެ.
އެ މައްސަލަ ފުލުހުން ތަހުގީގުކުރަމުން އަންނަ ކަމަށް ބުނި ނަމަވެސް މައްސަލައާ ގުޅޭ އިތުރު އެއްވެސް ތަފުސީލެއް ފުލުހުން ހިއްސާކޮށްފައެއް ނުވެ އެވެ.
މި ކަމާ ގުޅިގެން ކަސްޓަމްސްއިން ބުނީ އެ އިދާރާގެ ބައެއް އޮފިސަރުންނަށް ތުހުމަތު ކުރެވޭ، މަނީ ލޯންޑްރިންއާއި، ހިޔާނާތާއި، ރިޝްވަތާ ގުޅޭ މައްސަލަތަކެއް ފުލުހުން ތަހުގީގު ކުރަމުން ގެންދާކަމަށް އެ އިދާރާއަށް އަންގައިފައިވާ ކަމަށެވެ.
އެ މައްސަލަތަކާ ގުޅުން ހުރި ބައެއް ކަންކަން ރައްޔިތުންގެ މަޖިލިހުގެ 241 ކޮމިޓީ އަށް ވެސް ވަނީ ހުށަހަޅައިފަ އެވެ. އަދި ކޮމިޓީގެ ބައްދަލުވުންތައް ސިއްރު ކޮށްގެން، ސަރުކާރުގެ ކަމާ ގުޅުން ހުރި އިދާރާތަކުގެ ބައެއް އިސްވެރިންނާ ކޮމިޓީން ސުވާލު ކޮށްފައިވާ ކަމަށް އެނގިފައި ވެ އެވެ.
