އެ ކުންފުނިން ބުނީ، ދެފުށް ފެންނަ، ހާމަކަން ބޮޑު ގޮތެއްގައި އެ ކުންފުނީގެ މަސައްކަތްތައް ކުރިއަށް ގެންދިއުމަށް ކުރާ މަސައްކަތުގެ ދަށުން ތައާރަފު ކުރި މި ޑޭޝްބޯޑު ފީޗާއާ އެކު އަތޮޅުތެރޭގައި އެމްޓީސީން ހިންގާ ޕްރޮޖެކްޓުތަކާއި ޕްރޮޖެކްޓުތައް ކުރިއަށް ގޮސްފައި ހުރި މިންވަރު އަދި ހުއްޓިފައި ހުރި ޕްރޮޖެކްޓުތަކުގެ މައުލޫމާތު ވެސް ފެންނާނެ ކަމަށެވެ.
އެމްޓީސީސީން ބުނީ، ރިއަލް ޓައިމްގައި ފެންނަ އަޕްޑޭޓުތަކަށް ގޮސް، ވަކިވަކި ރަށްތަކުގެ މައުލޫމާތުތައް ވެސް ބަލައިލެވޭނެ ކަމަށެވެ. އަދި އެޕްރޮޖެކްޓްތައް ނިންމަން ކަނޑައަޅަފައިވާ ތާރީހު ވެސް އެނގޭނެ ކަމަށް އެ ކުންފުނިން ބުންޏެވެ.
އެމްޓީސީސީގެ ޕްރޮޖެކްޓް ޑޭޝްބޯޑުން ފުރަތަމަ ފެންނާނީ ރާއްޖޭގެ ޗާޓެވެ. އެ ޗާޓުން އެ ކުންފުނިން ކުރިއަށްގެންދާ މަޝްރޫއުތަކާއި ރަށްތައް ވެސް ފެންނާނެއެވެ. މީގެ އިތުރުން، ކޮންމެ އަތޮޅަކަށް ފިއްތާލުމުން ވެސް އެ އަތޮޅުގައި ކުރިއަށްދާ މަޝްރޫއުތަކުގެ އަދަދު ފެންނާނެއެވެ.
ވަކިވަކި ރަށްރަށުގެ މައުލޫމާތު ހޯދަން ބޭނުންވާ ނަމަ، އެ ރަށަކަށް ކްލިކްކޮށްލުމުން އެ ރަށެއްގައި ކުރިއަށްދާ މަޝްރޫއެއްގެ ތަފުސީލު ފެންނާނެއެވެ.
