މި ފަހުން ލަންކާގައި ދަނީ ކޮންމެ އަހަރަކު ވެސް ޑެންގީގެ ކޭސްތައް އިތުރުވަމުންނެވެ. އޭގެ ތެރެއިން އެންމެ ނުރައްކާތެރި ބަލިމަޑުކަމެއް ރެކޯޑު ކުރެވުނީ 2017 ވަނަ އަހަރު އެވެ. އެ އަހަރު 186،000 އަށްވުރެ ގިނަ ކޭސް ރެކޯޑު ކުރެވުނުއިރު، 440 އަށްވުރެ ގިނަ މީހުން ވަނީ އެ ބަލީގައި މަރުވެފަ އެވެ.

ޑެންގީ ކޮންޓްރޯލް ޔުނިޓުން ބުނީ ލަންކާގައި މިހާރު ޑެންގީ ވަނީ އާންމު ބައްޔަކަށް ވެފައި ކަމަށާއި މި އަހަރުގެ މިހާތަނަށް އެ ބަލީގައި 29 މީހަކު މަރުވެފައިވާ ކަމަށެވެ. އަދި  މި އަހަރުގެ މިހާތަނަށް ޑެންގީ ހުމުގެ 51،044 ކޭސް ރިޕޯޓްކޮށްފައިވާ ކަމަށް ނޭޝަނަލް ޑެންގީ ކޮންޓްރޯލް ޔުނިޓުން ބުނެފި އެވެ.  

ނޭޝަނަލް ޑެންގީ ކޮންޓްރޯލް ޔުނިޓުގެ އެކްޓިން ޑިރެކްޓަރު ކަޕިލާ ކަންނަންގަރާއާ ހަވާލާދީ "ޑެއިލީ މިރާ" ނޫހުން ރިޕޯޓުކޮށްފައިވާ ގޮތުގައި، ސްރީ ލަންކާގައި ކޮންމެ ދުވަހަކުވެސް އަލަށް 600 އާއި 700 އާ ދެމެދުގެ އަދަދަކަށް ޑެންގީ ކޭސްތައް ރިޕޯޓްކުރެ އެވެ. ލަންކާގެ އިތުރު މީޑިއާތަކުން ރިޕޯޓް ކުރާ ގޮތުގައި، މި ކޭސްތަކުގެ ގާތްގަނޑަކަށް 51 ޕަސެންޓް ހިއްސާކުރަނީ ވެސްޓާން ޕްރޮވިންސުންނެވެ.  

ޑެންގީ ހުން ޖެހޭ މީހުންގެ އަދަދު ދުނިޔޭގެ އެކި ކަންކޮޅުތަކުގައި އިތުރުވަމުން ދާއިރު ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނާ ގޮތުގައި ދުނިޔޭގެ އާބާދީގެ ދެބައިކުޅަ އެއްބަޔަށް ވުރެ ގިނަ މީހުންނަށް މިހާރު ވަނީ މި ހުމުގެ ނުރައްކާ ކުރިމަތިވެފަ އެވެ. އެ ޖަމިއްޔާ އިން ބުނެފައިވާ ގޮތުގައި މިހާރު އަހަރަކު 100-400 މިލިއަން މީހުންނަށް މުޅި ދުނިޔޭގައި މި ހުން ޖެހެ އެވެ.