އަލްހިޖުރަ ނަމަކަށް ކިޔާ ކުންފުންޏެއްގެ ހަވާލުގައި 24 މީހަކު މިދިޔަ ޑިސެމްބަރު މަހުން ފެށިގެން އުމްރާގެ އަޅުކަމަށް ސައުދީ އަރަބިއްޔާއަށް ގޮސް ތިބިއިރު، އެ މީހުން ރާއްޖެ އެނބުރި އަންނަން ޓިކެޓް އަދިވެސް ހަމަޖެހިފައެއް ނުވެ އެވެ.
އަލްހިޖްރަ ކުންފުނިން ފޭސްބުކްގައި މިރޭ ކުރި ޕޯސްޓެއްގައި ބުނީ އުމްރާވެރިންގެ އަޅުކަން ނިމިފައިވީ ނަމަވެސް، ކުންފުންޏަށް ދިމާވެފައިވާ މާލީ ދަތިތަކާ ހުރެ އުމްރާވެރިން ރާއްޖެ ގެންނަން ދަތިވެފައިވާ ކަމަށެވެ.
އިސްލާމިކް މިނިސްޓަރު ޑރ. ޝަހީމް އަންނަނީ "އެކްސް" މެދުވެރިކޮށް މި މައްސަލައާ ގުޅޭ އެންމެ ފަހުގެ މައުލޫމާތު ހިއްސާކުރައްވަމުންނެވެ.
އޭގެ ފަހުން ކުރެއްވި ޕޯސްޓެއްގައި ޝަހީމް ވިދާޅުވީ މައްކާގައި ދަތި ހާލަތެއް މެދުވެރިވި އުމްރާވެރިންނަށް ގުޅައި ހާލަތު ބެއްލެވި ކަމަށެވެ. އަދި ވިދާޅުވީ އުމްރާވެރިންނާ މެދު އިހްމާލުވި އަލްހިޖުރަ ގްރޫޕްގެ ވެރިންގެ މައްސަލަ ތަހުގީގުކޮށް ފިޔަވަޅު އަޅާނެ ކަމަށެވެ
މިދިޔަ އަހަރުގެ ޑިސެންބަރާ ދިމާކޮށް އެކި ގުރޫޕުތަކުގެ ހަވާލުގައި 6،300 އަށް ވުރެ ގިނަ މީހުން އުމްރާގެ އަޅުކަން އަދާކުރަން ސައުދީ އަރަބިއްޔާއަށް ގޮސްފައިވެ އެވެ.
ކުދިކުދި އުމްރާ ގްރޫޕުތަކުން މީހުން ސައުދީއަށް ގެންގޮސް، ހާލުގައި ޖެހިގެން މީގެ ކުރިން ވެސް މައްސަލަތައް ފެންމަތިވެފައި އެބަހުއްޓެވެ.
އަދި އުމްރާއަށް ގެންދިއުމުގެ ނަމުގައި ފައިސާ ހޯދުމަށްފަހު ބޮޑެތި ސްކޭމްތައް ވެސް ހިންގައިފައި އެބަހުއްޓެވެ.
