ބީއެމްއެލުން މިރޭ ނެރުނު ނޫސްބަޔާނެއްގައި ބުނީ ކްރިޕްޓޯ އެކްސްޗޭންޖު ކުރުމުގެ ހިދުމަތް އެ ބޭންކުގެ އެއްވެސް ވަސީލަތެއް މެދުވެރިކޮށް ނުދޭ ކަމަށެވެ.
ބީއެމްއެލްގެ އޭޓީއެމާއި ލޯގޯ ބޭނުންކޮށްގެން ކަސްޓަމަރުންނަށާއި އާންމުންނަށް އޮޅޭ ގޮތަށް، ކްރިޕްޓޯ އެކްސްޗޭންޖް ކުރުމުގައި އެ ބޭންކުން ޝާމިލުވެ، އެކަމަށް މަގުފަހި ކޮށްދޭ ކަމަށް ދޭހަވާ ގޮތަށް ވީޑިއޯއެއް އާންމު ކޮށްފައި ވާތީ ބޭންކުން ހިތާމަކުރާ ކަމަށް ވެސް ބުންޏެވެ. އަދި އެ އަމަލު ބީއެމްއެލް އިން ކުށްވެރި ކުރި އެވެ.
ބީއެލްމް އިން އެހެން ބުނީ، ޓްރޭޑް ކޮށްގެން ހޯދާ ކްރިޕްޓޯ ކަރަންސީ އެ ބޭންކުގެ އޭޓީއެމްތަކުން އެކްސްޗޭންޖު ކުރެވޭ ކަމަށް ދޭހަވާ ގޮތަށް ބުނެ ރައްޔިތުންގެ މަޖިލިހުގެ ފޭދޫ ދާއިރާގެ ކުރީގެ މެންބަރު އަލްހާން ފަހުމީ އެކްސްގައި ވީޑިއޯއެއް އާންމު ކުރުމުންނެވެ.
އެ ވީޑިއޯގައި އަލްހާން ބުނެފައި ވަނީ އޮންލައިން ޓްރޭޑް ކޮށްގެން ލިބޭ ކްރިޕްޓޯ ކަރެންސީ އެކަމަށް ހާއްސަކޮށް ހައްދާފައިވާ ބޭރުގެ ކާޑެއް މެދުވެރިކޮށް ބީއެމްއެލްގެ އޭޓީއެމުން އެކްސްޗޭންޖު ކުރެވޭ ކަމަށެވެ. އަދި އެ ކާޑު މެދުވެރިކޮށް 100،000 ޑޮލަރަށްވާ ދިވެހި ފައިސާ އެއްފަހަރާ ނެގޭނެ ކަމަށް އަލްހާން އެ ވީޑިއޯގައި ބުނެފައިވެ އެވެ.
