ގއ. އަދި ގދ. އަތޮޅުގެ ރަށްތަކަށް ރައީސް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ނޫސްވެރިންނާ ބައްދަލު ކުރައްވައި، ރައީސް ވިދާޅުވީ މިފްކޯ ރިފޯމްކޮށް ހަރުދަނާ ކުރުމުގެ ގޮތުން ބޭކާރު ހަރަދުތައް މަދުކުރުމުގެ މަސައްކަތް މި ސަރުކާރުން ކުރަމުން އަންނަ ކަމަށެވެ.
ރައީސް ވިދާޅުވި ގޮތުގައި ސަރުކާރުގެ މަސް ކުންފުންޏަށް ފުރަތަމަ ފަހަރަށް ބޭރުގެ ބޭފުޅަކު އައްޔަން ކުރެއްވީ ވެސް ކޮރަޕްޝަނާ ދެކޮޅަށް ކުރައްވާ މަސައްކަތުގެ ތެރެއިންނެވެ.
ރައީސް މުއިއްޒު ވިދާޅުވީ މަސްވެރިކަމުގެ ސިނާއަތް ރަނގަޅަށް ތަރައްގީ ކުރެވިއްޖެނަމަ އެއީ ރާއްޖެއަށް އެންމެ ބޮޑު އާމްދަނީއެއް ހޯދޭނެ ސިނާއަތް ކަމަށެވެ.
ރައީސް ވިދާޅުވީ މި ސަރުކާރުން މަސްވެރިން ބޭނުންވާ ކަންކަން އެންމެ ފުރިހަމައަށް ކޮށްދެއްވާނެ ކަމަށާއި ފަތުރުވެރިކަމަށްވުރެ މަސްވެރިކަމުގެ ސިނާއަތް ކުރިއެރުވޭނެ ކަމަށެވެ. ރައީސް ވިދާޅުވީ އެެހެންކަމުން މަސްވެރިންނަށް ދޭން ބޭނުންވާ ޔަގީންކަމަކީ މި ސަރުކާރުގެ އަޒުމަކީ މަސްވެރިކަން އެންމެ ފުރިހަމަ ޕޮޓެންޝިއަލްގައި ފުޅާކުރުން ކަމަށެވެ.
މި ސަރުކާރު ވެރިކަމާ ހަވާލުވިއިރު، އޮޑިވެރިންނަށް ދޭންޖެހޭ 230 މިލިޔަން ރުފިޔާގެ ދަރަނި އެއްކޮށް ހަލާސްކޮށް ރައީސް މިފަހުން ވަނީ މަސްވެރިންނަށްވެފައިވާ 48 ގަޑިއިރުގެ ތެރޭގައި ފައިސާ ދޫކުރުމުގެ ވައުދު ވެސް ފުއްދަވާފަ އެވެ.
ސިޔާސީ ނުފޫޒުން އެއްކިބާވެ، ރާއްޖޭގެ މަސްވެރިކަމުގެ ސިނާއަތުގައި މިފްކޯގެ މަގާމު އިތުރަށް ހަރުދަނާ ކުރަމުން އަންނައިރު، މިފްކޯގެ އާ ސީއީއޯގެ ތަސައްވުރަކީ މިނިވަންކަމާއެކު ދެފުށްފެންނަ، ޕްރޮފެޝަނަލް މަސައްކަތްތަކެއް ކުރާ ކުންފުންޏެއްގެ ގޮތުގައި މިފްކޯ ދެމި އޮތުމެވެ.
