މިނިސްޓަރު ވިދާޅުވީ ހާލުގައި ޖެހުނު އުމްރާވެރިން ހައްޖު ކޯޕަރޭޝަންގެ އުމްރާވެރިން ތިބި ހޮޓަލަށް މިހާރު ބަދަލުކޮށްފައިވާ ކަމަށެވެ. އަދި ގަތަރު އެއާވޭސްގައި އެ މީހުން އަންނަ ހޮނިހިރު ދުވަހުގެ ހެނދުނު 8:10 ގައި ރާއްޖެ ގެނެވޭނެ ކަމަށް މިނިސްޓަރު ވިދާޅުވި އެވެ.
އުމްރާވެރިން ހާލުގައި ޖެހެން މެދުވެރިވީ، އުމްރާވެރިން ދަތުރަށް ފައިސާ ދައްކާފައިވީ ނަމަވެސް އެ ފައިސާއިން އުމްރާވެރިންގެ ދެކޮޅު ޓިކެޓު ހަމަނުޖައްސާ އެ ފައިސާ ކުންފުނީގެ އެހެން ކަންކަމަށް ބޭނުންކޮށްފައިވާތީކަމަށް އެ ކުންފުނިން ވަނީ އިއުތިރާފުވެފައެވެ.
އެކަމާ ގުޅުވައި ޝަހީމް ވިދާޅުވީ، ހާލުގައި ޖެހުނު މީހުން، އެ މިނިސްޓްރީގެ އިރުޝާދުގެ ދަށުން ހައްޖު ކޯޕަރޭޝަންގެ އުމްރާވެރިން ތިބި ހޮޓަލަށް ބަދަލުކޮށްފައިވާ ކަމަށެވެ.
އަލް-ހިޖުރަ ގްރޫޕުގެ ހަވާލުގައި އުމްރާ އަށް ގެންދިޔަ މީހުންނާމެދު އިހުމާލުވި މައްސަލާގައި އެ ކުންފުނި 100،000ރ. އިން ޖޫރިމަނާކޮށް، ކުންފުނީގެ ވެރިންގެ މައްޗަށް ފިޔަވަޅު އަޅަން ފުލުހަށް ހުށަހަޅާނެ ކަމަށް އިސްލާމިކް މިނިސްޓްރީން ވަނީ ބުނެފަ އެވެ.
