މިދިޔަ މަހު ފުލުހުން ހިންގި ހާއްސަ އޮޕަރޭޝަނެއްގައި ހައްޔަރުކުރި މި ދެ މީހުންނަކީ ދޫޑިގަން، ކަރަންކާވިލާ އަހުމަދު ނިއުޝާދު (34 އަހަރު) އާއި ދޫޑިގަން، ޒަމާނީވިލާ، ހަސަން އާޒިމް (29 އަހަރު) އެވެ. މި ދެ މީހުންނަކީ މި ވިއުގާގައި އިސްކޮށް ހަރަކާތްތެރިވާ ކަމަށް ފުލުހުން ތުހުމަތުކުރެއެވެ.
ފުލުހުންގެ ތަހުގީގަށް ލިބިފައިވާ މައުލޫމާތުން، ނިއުޝާދުގެ ބޭންކު އެކައުންޓުން ފާއިތުވި ފަސް އަހަރުގެ ތެރޭގައި 21 މިލިއަން ރުފިޔާއަށް ވުރެ ގިނަ ރުފިޔާގެ މުއާމަލާތް ހިންގާފައިވެއެވެ. އަދި އާޒިމްގެ އެކައުންޓުން ދެ އަހަރުގެ ތެރޭގައި ހަތް މިލިއަން ރުފިޔާއަށް ވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށް ފުލުހުން ބުނެއެވެ.
ހައިކޯޓުން މިއަދު ނެރުނު އަމުރުގައި ބުނެފައިވަނީ ފުވައްމުލަކު މެޖިސްޓްރޭޓް ކޯޓުން އެ މީހުން ޝަރީއަތް ނިމެންދެން ބަންދުކުރި އަމުރަކީ ޖިނާއީ އިޖުރާއަތުގެ ގާނޫނާ ހިލާފު އަމުރެއް ކަމަށެވެ. އަދި އެ އަމުރު ބާތިލުކުރުމަށް ހައިކޯޓުން ވަނީ ނިންމާފައެވެ.
- ދެ މީހުންގެ އެކައުންޓުތަކުން ޖުމުލަ 28 މިލިއަން ރުފިޔާގެ މުއާމަލާތް ހިންގާފައިވާކަަމަށް ފުލުހުން ބުނޭ
- ފުވައްމުލަކު މެޖިސްޓްރޭޓް ކޯޓުގެ އަމުރަކީ ގާނޫނާ ހިލާފު އަމުރެއް ކަމަށް ހައިކޯޓުން ކަނޑައަޅައިފަ
- މި ދެ މީހުންނަކީ މަސްތުވާތަކެތީގެ ވިޔަފާރީގައި އިސްކޮށް ހަރަކާތްތެރިވާ ކަމަށް ތުހުމަތުކުރެވޭ ފަރާތްތައް
- މައްސަލައިގައި އިތުރު ބަޔަކު ވެސް ހައްޔަރުކޮށްފައިވޭ
