އެމެރިކާ އޮފިޝަލުންނާ ހަވާލާދީ ރޮއިޓާސް ބުނި ގޮތުގައި ލޮސް އެންޖެލިސް ސްޓޭޓްގެ ޖަންގަލިތަކުގެ އެކި ސަރަހައްދުތަކުގައި ތިން އަލިފާންގަނޑެއް، މިހާރު ވެސް ކޮންޓްރޯލް ނުވެ އަނދަމުން އެބަ ދެ އެވެ. އެ އަލިފާންގަނޑުތައް މީހުން ދިރިއުޅޭ ސަރަހައްދުތަކަށް ފެތުރިފައި ވާއިރު އެންމެ ބޮޑު ގެއްލުމެއް ލިބެމުންދާ ކަމަށް ރިޕޯޓްކޮށްފައި ވަނީ ލޮސްއެންޖަލިސް އިންނެވެ.
އެ ޝަހަރުން 100،000 އަށް ވުރެ ގިނަ މީހުން ގެދޮރު ދޫކޮށް ދާން ޖެހިފައި ވާއިރު އޭގެ ތެރޭގައި ހޮލީވުޑް ސެލެބްރިޓީން ވެސް ހިމެނެ އެވެ. ގަދަ ވަޔާ އެކު ފެތުރި އަނދަމުންދާ އަލިފާންގަނޑުތަކުގެ ސަބަބުން 2،000 އަށްވުރެ ގިނަ އިމާރާތް ވަނީ އަޅިއަށް ވެފަ އެވެ. އޭގެ ތެރޭގައި ގިނައީ އެތައް މިލިއަން ޑޮލަރެއްގެ ގެތަކެކެވެ.
އެމެރިކާގެ ލޮސް އެންޖެލިސްގައި ރޯވި ބޮޑު އަލިފާން ގަނޑު ނިންވަން ފަޔާ ފައިޓަރުން ހަރަކާތްތެރި ވަނީ. -- ފޮޓޯ: އޭއެފްޕީ
އެމެރިކާގެ ދެވަނަ އަށް އެންމެ ބޮޑު ސިޓީގެ ވަށައިގެން ރޯވެ އަނދަމުން ދާއިރު އެތަނުގެ އާންމުން ތިބީ ހަދާނެ ގޮތް ހުސްވެ ބިރުވެރިކަމުގެ ތެރޭގަ އެވެ. ދުނިޔޭގެ އެންމެ މުއްސަނދި އާޓް މިއުޒިއަމްތަކުގެ ތެރޭގައި ހިމެނޭ ގެޓީ ވިލާ މިއުޒިއަމްގެ ދަނޑުގައި ހުރި ބައެއް ގަސްގަހާގެއްސަށް ވެސް މި ހާދިސާގެ ސަބަބުން ގެއްލުން ވެފައިވެ އެވެ.
ލޮސްއެންޖަލިސްގެ މޭޔަރު ކަރެން ބާސް، މީޑިއާތަކަށް ވިދާޅުވެފައިވާ ގޮތުގައި އަލިފާންގަނޑުތައް ވަރުގަދަވީ ހަނަފަސްކަން ބޮޑުވެފައި ވުމާ އެކު ވައިޖެހޭލެއް ގަދަކަމުންނެވެ. ގަޑިއަކު 100 މޭލު (160 ކިލޯމީޓަރު) ގެ ބާރުމިނުގައި ވައި ޖެހެމުން ދިޔައިރު ޕެސިފިކް ޕެލިސޭޑްސް އަވަށުގެ ވަށައިގެން އަލިފާން ގަނޑު ފެތުރުނީ ވިދުވަރުގެ ބާރުމިނުގައި އެވެ.
ގެދޮރު ދޫކޮށް ދާން ޖެހިުނު މީހުންގެ ތެރޭގައި ހޮލީވުޑް ސެލެބްރިޓީން ވެސް ހިމެނޭ
އެމެރިކާގެ އެންޖެލިސްގައި ހިނގާފައިވާ މިހާދިސާގައި 5 މީހަކު މިހާތަނަށް ވަނީ މަރުވެފަ އެވެ. އަލިފާނުގެ ހާދިސާ އިތުރަށް ގޯސްވާތީ ކެލިފޯނިއާގައި ވަނީ ކުއްލި ނުރައްކަލުގެ ހާލަތުވެސް އިއުލާން ކޮށްފަ އެވެ.
އެމެރިކާގެ މޫސުމާ ބެހޭ އިދާރާތަކުން ބުނެފައިވަނީ ކުރިއަށް އޮތް ދުވަސްތަކުގައިވެސް މޫސުން އޮންނާނީ އަލިފާންގަނޑު އިތުރަށް ފެތުރޭނެ ގޮތަށްކަމަށެވެ. އެގޮތުން ވައިގެ ތެތްކަން ދަށްވެ، ވައިގަދަވުމުގެ ސަބަބުން އަލިފާންގަނޑު ފެތުރުމަށް އިތުރު ބާރަކަށްވަމުންދާކަމުގަ އެވެ.
