އިންސްޓަގްރާމްގައި ޕޯސްޓެއް ކުރަމުން ނޯރާ ބުނީ މިފަދަ ނުރައްކާތެރި އަލިފާނުގެ ހާދިސާއެއް އޭނާ މީގެ ކުރިން ދުވަހަކުވެސް ނުދެކޭ ކަމަށެވެ. އަދި އިވެކުއޭޝަން އޯޑަރެއް ލިބުމާ ގުޅިގެން އަވަސް އަވަހަށް ތަކެތި ޕެކްކޮށް އެއާޕޯޓާ ދިމާލަށް ދާން ޖެހުނު ކަމަށް އެނާ ބުންޏެވެ.
ނޯރާގެ އިތުރުން ޕްރިޔަންކާ ޗޯޕްރާ އާއި ޕެރިސް ހިލްޓަން ފަދަ ގިނަ މަޝްހޫރު ތަރިންނަށްވެސް މި އަލިފާނުގެ ހާދިސާގެ ސަބަބުން އަސަރުކޮށްފައިވެއެވެ. ޕްރިޔަންކާ އޭނާގެ އިންސްޓަގްރާމް ސްޓޯރީގައި މި ހާދިސާގެ މަންޒަރުތައް ހިއްސާކޮށް، އަލިފާނުގެ ހާދިސާއިން އަސަރު ކުރާ އެންމެންނަށް ހެޔޮ އެދުންތައް ފޮނުވާފައިވެއެވެ.
އަލިފާނުގެ ހާދިސާގައި މިހާތަނަށް 10،000 އަށް ވުރެ ގިނަ އިމާރާތް ހަލާކުވެ، 13،750 ހެކްޓަރުގެ ސަރަހައްދެއް އަނދައިގެން ގޮސްފައިވެއެވެ. އަދި މަދުވެގެން 10 މީހުން މަރުވެފައިވާ ކަމަށް މައުލޫމާތު ލިބެއެވެ.
