މި ހާއްސަ ހަރަކާތް އޮންނާނީ ދުބާއީ އިންޓަނެޓް ސިޓީގައި ކަމަށް މި އިވެންޓް އިންތިޒާމުކުރާ ފަރާތްތަކުން ވަނީ ހާމަކޮށްފަ އެވެ.
މި ފެސްޓިވަލަކީ ގުދުރަތީ ގޮތުން ބޯބުޅިކޮށް ނުވަތަ ރާޅުބާނި ގޮތަކަށް އިސްތަށިގަނޑު ހުންނަ މީހުންނަށް ހާއްސަކޮށް، އެފަދަ އިސްތަށިގަނޑު ރީތިކޮށް ބެލެހެއްޓުމާއި ފަރުވާ ދިނުމާ ގުޅޭގޮތުން މައުލޫމާތު ދިނުމަށް ބާއްވާ ހަރަކާތެކެވެ. މީގެ އިތުރުން މި ހަރަކާތުގެ ތެރެއިން އެކި ބާވަތުގެ ޕްރޮޑަކްޓްތައް ތައާރަފުކުރުމާއި، އިސްތަށިގަނޑު ސްޓައިލްކުރުމުގެ ހުނަރުތައް ދައްކާލުމުގެ ދަންފަޅިތައް ކުރިއަށްދާނެ އެވެ.
އިންތިޒާމުކުރާ ފަރާތުން ބުނީ މި ފެސްޓިވަލަށް ވަނުމުގެ ޓިކެޓް މިހާރު އޮންލައިންކޮށް ބުކްކުރުމަށް ހުޅުވާލާފައިވާ ކަމަށެވެ. އެގޮތުން ބޮޑެތި މީހުންނަށް ހާއްސަ ޓިކެޓްގެ އަގު 100 ދިރުހަމުން ފެށޭއިރު، އާއިލާތަކަށް ހާއްސަ ފެމިލީ ޕާހެއްގެ އަގު އުޅެނީ 280 ދިރުހަމުގަ އެވެ.
ފެސްޓިވަލްގެ ތެރޭގައި ކުޑަކުދިންނާއި ބޮޑެތި މީހުންނަށްވެސް ބައިވެރިވެވޭނެ ތަފާތު މުނިފޫހިފިލުވުމުގެ ހަރަކާތްތަކާއި، ކާބޯތަކެތީގެ ސްޓޯލްތަކުގެ އިތުރުން މިއުޒިކީ ހުށަހެޅުންތައްވެސް އޮންނާނެއެވެ. މީގެ އިތުރުން ބައިނަލްއަގުވާމީ ފެންވަރުގެ މަޝްހޫރު ހެއާ ސްޓައިލިސްޓުންނާ ބައްދަލުކޮށް، އިސްތަށިގަނޑާ ގުޅޭ މުހިންމު އިރުޝާދުތައް ހޯދުމުގެ ފުރުސަތު ބައިވެރިންނަށް ލިބިގެންދާނެ އެވެ.
މި ހަރަކާތަކީ މެދުއިރުމަތީގެ ސަރަހައްދުގައި ގުދުރަތީ އިސްތަށިގަނޑަށް ހޭލުންތެރިކަން އިތުރުކުރުމަށާއި، އަމިއްލަ ސިފައަށް ފަހުރުވެރިވުމަށް ހިތްވަރު ދިނުމުގެ ގޮތުން ބާއްވާ ވަރަށް ތަފާތު އިވެންޓެކެވެ. ދުބާއީ ކާލް ފެސްޓިވަލްގެ ސަބަބުން މި ދާއިރާއަށް ހާއްސަ ވިޔަފާރިތަކަށާއި އާންމު ފަރާތްތަކަށް އެއް ފުރާޅެއްގެ ދަށުން ބައްދަލުވެ ހިޔާލު ބަދަލުކުރުމުގެ ބޮޑު ފުރުސަތެއް ތަނަވަސްވެގެންދާނެ ކަމަށް އިންތިޒާމުކުރާ ފަރާތުން ގަބޫލުކުރެ އެވެ.
