
ސޯޝަލް މީޑިއާގައި އާންމުކުރި ވީޑިއޯގައި ފެންނަނީ ބަޔަކު ވެގެން މަގުގެ ޕޭވްމަންޓް ހަދަން ޖަހާފައި ހުރި ގާތަށް ރޫޅާލާ މަންޒަރެވެ. އަދި އެކަންކުރީ މާމިގިލީ ކައުންސިލް ރައީސް އަދި ސެކްރެޓަރީ ޖެނެރަލް ކަމަށް ބައެއް ފަރާތްތަކުން ފަތުރައެވެ.
"ސީއެންއެމް" އަށް މައުލޫމާތު ދެމުން އާރްޑީސީގެ މީޑިއާ ކޯޑިނޭޓަރު ފައިރޫޒް ވިދާޅުވީ މާމިގިލީގައި މަގުގެ މަސައްކަތް ކުރަމުން ދަނިކޮށް ބަޔަކު ނިކުމެ، ހުއްޓުވަން މަސައްކަތްކޮށް ގެއްލުން ދީފައިވާކަމަށެވެ. އަދި ފުލުހުންނަށް އެ މައްސަަލަ މިހާރު ހުށަހަޅާފައިވާކަމަށްވެސް ފައިރޫޒް ވިދާޅުވިއެވެ.
މާމިގިލި މަގުހެދުމުގެ މަސައްކަތް ފުރަތަމަ ފެށީ މަގުގެ ޑިޒައިންވެސް ހިމެނޭގޮތަށް ހުރިހާ އެއްޗެއްް އެޕްރޫވްކޮށް ، އެއްބަސްވެގެން ނަަމަވެސް އެކި ފަަހަރު މަތިން ސްކޯޕަށް ބަދަލުގެންނަށް ޖެހުމާއި، އަގު އަދި ޑިޒައިންފަދަ އިތުރު ކަންކަމަށް ބަދަލުގެންނަން ޖެހިގެން ހުއްޓުނު ފަހަރުތަކެއްވެސް ކުރިން އައި ކަަމަށް ފައިރޫޒް ވިދާޅުވިއެވެ. އަދި ކުރިން އެގޮތަށް ކަންކަން ދިމާވިނަމަވެސް މިވަގުތު މަގުހެދުމުގެ މަސައްކަތް އެބަ ކުރިއަށް ދާކަމަށް އޭނާ ފާހަގަކުރެއްވިއެވެ.
އެކަން ކުރީ ކޮންބައެއްތޯ ސުވާލުކުރުމުން ފައުރޫޒް ވަނީ އެކަން އާރްޑީސީގެ ފަރާތުން ކަށަވަރުކޮށްދެވެން ނެތް ކަމަށް ބުނެފައެވެ.
މިކަމާ ގުޅޭގޮތުން "ސީއެންއެމް" އަށް ވަނީ މާމިގިލީ ކައުންސިލް ރައީސް އިމާދް ފާރޫގްވެސް މައުލޫމާތުދެެއްވާފައެވެ.
އޭނާ ވިދާޅުވީ މައްސަލައަކަށް ވެގެން އުޅެނީ ކާބް ޖަހާފައި ހުރީ މަގުގެ މެދުން ކަމަށްވާތީ ކަަމަށެވެ. އެކަމަށް ބަލުގެންނަން ކޮންސްޓްރަކްޝަން މިނިސްޓްރީއަށް އަންގާގެން ވާހަކަދައްމުން އަންނަތާ 2 އަހަރު ދުވަސް ވާން ކައިރިވެފައިވާކަމަށް ފާރޫގް ވިދާޅުވުއެވެ. އަދި މަގުގެ ކުރެހުމަކީ ކުރީގެ ކައުންސިލް އޮތް އިރު އެޕްރޫވް ކުރި ކުރެހުމެއްކަަމަށްވެސް އޭނާ ބުނެއެވެ.
މިފަދަ ކަންކަން ދެނެގަނެވިފައި މިވަނީ މަސައްކަތް ފެށުމުން ކަމަށް އޭނާ ބުނެއެވެ. މިހާރު ހުރިގޮތުން ނަމަ އެއްފަރާތަށް ޕޭމްންޓް ނަގާފައި އެހުރީ މަގު މެދު ސެންޓާ ލައިނުން ކަމަށާއި އަދި ގާތަށް ނެގީ އެތަނުން ކަމަށް ކައުންސިލް ރައީސް ވިދާޅުވިއެވެ.
ވީޑިޯގައި އެކަން ކުރީ ކައުންސިލް ރައީސް އާއި އެސްޖީ ކަމަށް ބައެއް ފަރާތްތަކުން ބުނި ނަމަވެސް އެކަމާ ބެހޭގޮތުން ކައުންސިލް ރައީސްގެ ވެސް ބަހެއް ލިބިފައެއް ނުވެއެވެ.