މިކަން ހާމަކޮށް މާލެ ސިޓީ ކައުންސިލުން ބުނީ، މ.ނެވިގޭޓަރ އިމާރާތްކުރަމުންދަނިކޮށް އެ ގެ ޖެހިގެން ހުރި ގެ މ.ލަކީހެވެންގެ ގަނބައިގަނެ އަޑިއަށްދާތީ އެގެއިން މީހުން ހުސްކުރުމުގެ މަސައްކަތް ކުރަމުންދާ ކަމަށެވެ.
މިކަން ފާހަގަވީ މިއަދު މެންދުރު ފަހު އެވެ. މި ހާދިސާގައި އެއްވެސް މީހަކަށް އަނިޔާއެއް ނުވެ އެވެ.
ދިމާވި މައްސަލައަކީ އެގެ އިމާރަތްކުރަމުން ދިޔައިރު ޝީޓް ޕައިލްނުކޮށް ހުރުމުން ޖެހިގެން ހުރި މ. ލަކީ ހެވަންގޭގައި ރެނދުއަޅާ އަޑިއަށް ދާން ފެށުން ކަމަށް ކައުންސިލުން މައުލޫމާތު ދެ އެވެ.
އަދި މިކަން ފާހަގަވުމުން އެގެ ހުސްކޮށް، ގޭބިސީގައި ޖުމްލަކޮށް އުޅޭ އެންމެން އެހެން ތަނަކަށް ބަދަލުކުރުމުގެ މަސައްކަތް މިހާރު ދަނީ ކުރަމުންނެވެ.
އެހެން ތަނަކަށް ބަދަލުކުރަނީ އެގޭގައި އުޅުނު 4 އާއިލާއެއްގެ، 18 އަހަރުން ދަށުގެ 3 ކުދިންނާއި 6 މީހުންނާއި ގޭގެ ދެ ބައެއްގައި ކުއްޔަށް ދިރިއުޅުނު ބޭރު ބައެކެވެ.
