މާފަންނު ސަހަރާ ހުސްކުރުމުގެ މަސައްކަތް ބަޔަކާއި ހަވާލުކޮށްގެން މާލޭ ސިޓީ ކައުންސިލުން ކުރަމުން އަންނައިރު އެ ސަރަހައްދުގައި ހުރި ސްޓޯމްވޯޓާ ޕަމްޕް ސްޓޭޝަނަށް ގެއްލުންތަކެއް ލިބިފައިވާ ކަމަށާއި އެއީ ގަސްދުގައި ކޮށްފައިވާ ކަމެއްކަމަށް ބެލެވޭކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް މިއަދު ވަނީ ވިދާޅުވެފައެވެ.
ކޮންސްޓްރަކްޝަން މިނިސްޓްރީން މިރޭ ނެރުނު ބަޔާނެއްގައި ބުނީ މާލޭގެ އެކި ސަރަހައްދުގައި ގާއިމުކޮށްފައިވާ ޕަމްޕް ސްޓޭޝަންތައް ރަނގަޅަށް މަސައްކަތް ކުރޭތީ އެ މިނިސްޓްރީން ބަލަމުން އަންނަކަމަށެވެ. މިގޮތަށް ބެލިބެލުމުން މާފަންނު ސަހަރާގައި ގާއިމުކޮށްފައިވާ ޕަމްޕު ސްޓޭޝަނަށް ގުޅާފައިވާ ހޮޅިތައް ބޭނުން ނުކުރެވޭ ވަރަށް ހަލާކުކޮށްލާފައިވާކަން ފާހަގަކުރެވިފައިވާކަމަށް މިނިސްޓްރީން ބުނެއެވެ. އަދި މި ޕަމްޕް ސްޓޭޝަންތައް ހަލާކުވެފައިވަނީ މާލޭ ސިޓީ ކައުންސިލުން މާފަންނު ސަހަރާގައި ކުރަމުންދާ މަސައްކަތެއްގެ ތެރެއިން އެއްވެސް ބެލުމެއްނެތި ކޮނެފައިވާތީކަމަށާއި އަދި އެ މަސައްކަތް ކޮށްފައިވަނީ މިނިސްޓްރީއާ ހިއްސާ ކުރުމެއްނެތިކަމަށްވެސް ކޮންސްޓްރަކްޝަން މިނިސްޓްރީން ބުނެއެވެ.
އިތުރަށް ކިޔާލުމަށް : ފަމްޕުތައް ހަލާކުވިތާ 5 މަސް، މުއްތަލިބްގެ ސަމާލުކަމަށް ގެނައިން: އާޒިމް
މިނިސްޓްރީއާއި މިނިސްޓަރުގެ މުއްތަލިބުގެ މި ވާހަކަތަކަށް މާލޭ ސިޓީގެ މޭޔަރު އާދަމް އާޒިމް ވަނީ ރައްދުދެއްވާ އެ ވާހަކަތައް ދޮގުކުރައްވާފައެވެ. އާޒިމް ވިދާޅުވީ މާފަންނު ސަހަރާގައި ހުރި ސްޓޯމް ވޯޓާ ޕަމްޕް ސްޓޭޝަންތައް ހަލާކުވެފައި ހުންނަތާ ފަސް މަސް ދުވަސް ވެދާނެ ކަމަށާއި އެކަން މިނިސްޓަރު ޑރ. އަބްދުﷲ މުއްތަލިބުގެ ސަމާލުކަމަށްވެސް ގެންނެވިކަމަށެވެ.
