އެ އިދާރާއިން ބުނީ މިދިޔަ އަހަރު އެކި އޮޕަރޭޝަންތަކުގައި ޖުމްލަ 15،514 އުޅަނދު ޓޯ ކޮށްފައިވާކަމަށެވެ. މީގެ ތެރޭގައި އެންމެ ގިނައީ މޮޓޯ ސައިކަލްކަމަށްވެސް ފުލުހުން ބުނެއެވެ. އެގޮތުން 11،645 މޮޓޯސައިކަލް ޓޯ ކުރިކަމަށް ފުލުހުންގެ ހިސާބުތަކުން ދައްކައެވެ.
ޓޯ ކުރި އުޅަނދުތަކުގެ ހިސާބުތައް
- 11،645 މޮޓޯސައިކަލް،
- 2،567 ކާރު
- 478 ޕިކަޕް
- 369 ވޭން
- 87 ޓްރަކް
ޓޯ ކުރި އުޅަނދުތަކުގެ ތެރެއިން 546 އުޅަނދު ނައްތާލާފައިވާކަމަށްވެސް ފުލުހުން ބުނެއެވެ.
މަގުމަތީގެ ރައްކާތެރިކަން ކަށަވަރުކޮށް މަގުމައްޗަކީ އެންމެނަށް އަމާން ތަނަކަށް ހެދުމަށް ކުރެވުނު މަސައްކަތުން ފާއިތުވި އަހަރު ޖުމްލަ 73،953 އުޅަނދު ޗެކްކޮށް، 7،606 އުޅަނދަކާމެދު ފިޔަވަޅު އަޅާފައިވާކަމަށްވެސް ފުލުހުން ބުނެއެވެ.
އެގޮތުން، 66،347 މީހަކަށް ނަސޭހަތް ދީފައިވާއިރު، 7،606 މީހަކަށް ވަޔަލޭޝަން ސްލިޕް ދިންކަމަށް ފުލުހުން ބުނެއެވެ. މީގެ އިތުރުން، ލައިސަންސް ނެތި ދުއްވި 2،138 މީހަކު ފާހަގަކުރެވުނުކަމަށާއި މީގެ ތެރޭގައި ދެފުރޮޅުލީ 2،005 އުޅަނދާއި ހަތަރު ފުރޮޅުލީ 133 އުޅަނދު ހިމެނޭކަމަށްވެސް ފުލުހުން ބުނެއެވެ.
ނުރައްކާތެރިކޮށް ދުއްވުމުގެ 293 މައްސަލަ ފާހަގަކުރެވުނުކަމަށާއި އޭގެތެރޭގައި ދެފުރޮޅުލީ 271 އުޅަނދާއި ހަތަރު ފުރޮޅުލީ 22 އުޅަނދު ދުއްވުމުގެ މައްސަލަތައް ހިމެނޭކަމަށްވެސް ފުލުހުން ބުނެއެވެ.
