މާފަންނު ސަހަރާ ހުސްކުރުމުގެ މަސައްކަތް ބަޔަކާއި ހަވާލުކޮށްގެން މާލޭ ސިޓީ ކައުންސިލުން ކުރަމުން އަންނައިރު އެ ސަރަހައްދުގައި ހުރި ސްޓޯމްވޯޓާ ޕަމްޕް ސްޓޭޝަނަށް ގެއްލުންތަކެއް ލިބިފައިވާ ކަމަށާއި އެއީ ގަސްދުގައި ކޮށްފައިވާ ކަމެއްކަމަށް ބެލެވޭކަމަށް މިނިސްޓަރު މުއްތަލިބް ވަނީ ވިދާޅުވެފައެވެ. މިނިސްޓަރުގެ މިވާހަތަކަށް ރައްދުދެއްވަމުން މާލޭ މޭޔަރު އާދަމް އާޒިމް ވަނީ މާފަންނު ސަހަރާގައި ހުރި ސްޓޯމް ވޯޓާ ޕަމްޕް ސްޓޭޝަންތައް ހަލާކުވެފައި ހުންނަތާ ފަސް މަސް ދުވަސް ވެދާނެ ކަމަށާއި އެކަން މިނިސްޓަރު ޑރ. އަބްދުﷲ މުއްތަލިބުގެ ސަމާލުކަމަށް ގެނައިކަމަށެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މިނިސްޓަރު މުއްތަލިބް ވަނީ މޭޭޔަރު އާޒިމް ދެއްކެވި ވާހަކަތައް ދޮގުކުރައްވާފައެވެ. މުއްތަލިބް ވިދާޅުވީ މާފަންނު ސަހަރާގެ ޕަމްޕް ސްޓޭޝަންގެ އައުޓް ފޯލުން އޭގެ ކުރީ ހަފްތާގައި ފެން ބޭރުވާ ތަނުގެ ވީޑިއޯވެސް އެބަހުރިކަމަށެވެ. އަދި އެތަން ފެންސް ޖަހާ ބައްދާފައި ހުރި ނަމަވެސް އޭގެ ކުރީ ހަފްތާގައި އެ ޕަމްޕް ސެޓޭޝަން މަސައްކަތް ކުރިކަމުގެ ޔަގީންކަން އެބައޮތްކަމަށް މުއްތަލިބް ވިދާޅުވިއެވެ.
މާފަންނު ސަހަރާގެ ޕަމްޕް ސެޓޭޝަންގެ ކަރަންޓް ސަމާނުތައް ވަގަށް ނަގާ އެތަން ހާލުކުކޮށްލާފައިވާކަމަށް މޭޔަރު އާޒިމް ދެއްކެވި ވާހަކަތަކަށްވެސް މިނިސްޓަރު މުއްތަލިބް މިއަދު ވަނީ ރައްދުދެއްވާފައެވެ.
މިނިސްޓަރު މުއްތަލިބް ވިދާޅުވީ ޕަމްޕު ސްޓޭޝަންތައް ބެލެހެއްޓުމަށް އެމްޑަބްލިޔުއެސްސީ އާ އެކު ހަދާފައިވާ އެއްބަސްވުން 5 މަސްކުރިން ހަމަވެފައިވާކަމަށެވެ. އެހެންނަމަވެސް އެ ކުންފުނިން ބަރާބަރަށް ނެޓްވޯކް ސާފުކޮށް ނުބަލާތީ އެ މަސައްކަތް އާރުޑީސީއާ ހަވާލުކުރަން ނިންމިކަމަށާއި އެއީ ސީދާ އޭނާގެ ނިންމުމެއްކަމަށެވެ.
