ކުންފުނިން ނެރުނު ބަޔާނެއްގައި މިކަން ހާމަކޮށްފައިވަނީ، ގަވާއިދާ ހިލާފަށް ގާ ކުނޑި އެޅުމުގެ ސަބަބުން އެތަކެތި ނެގުމަށް ކައުންސިލުން އެންގުމާ ގުޅިގެން ނެރުނު ބަޔާނެއްގައެވެ. އެ ބަޔާނުގައި ބުނެފައިވާ ގޮތުން، ތިނަދޫ ޕޮލިސް ސްޓޭޝަން ތަޅާލުމުގެ މަސައްކަތުން އުފެދޭ ގައުކުނޑި އެޅުމަށް ކައުންސިލްގެ ދެ މުވައްޒަފުން ވަނީ ސަރަހައްދެއް ދައްކާފައެވެ.
ކުންފުނިން ބުނީ، ގާ ކުނޑި އަޅަމުން ގެންދަނީ ކައުންސިލުން ދެއްކި ތަނަށް ކަމަށާއި، އެއީ އީޕީއޭއިން ވެސް މިފަދަ ތަކެތި އެޅުމަށް އެހެން ރަށްރަށުގައި ހުއްދަ ދީފައިވާ ފަދަ، ގިރަމުންދާ ސަރަހައްދުތަކެއް ކަމަށެވެ. އަދި މި ސަރަހައްދަށް ދުވާލާއި ރޭގަނޑު ގައުކުނޑި އަޅަމުން ގެންދާތާ ދެ މަހަށް ވުރެ ގިނަ ދުވަސް ވެފައިވާ ކަމަށް ވެސް ބުނެފައިވެއެވެ.
ސްވިފްޓް އިންޖިނިއަރިންގެ ބަޔާނުގައި އިތުރަށް ފާހަގަކޮށްފައިވަނީ، ފްލެޓް އެޅުމަށް ކޮނެފައިވާ ބިމަށް އަޅާފައިވާ ތަކެތި އަޅާފައިވަނީ އެމްޓީސީސީގެ ތިނަދޫ ސައިޓުން ކަމަށާއި، އެއީ އެ ކުންފުނިން ކޮށްފައިވާ ކަމެއް ނޫން ކަމަށެވެ. އަދި ކައުންސިލުން ދެއްކި ތަނަށް އަޅާފައިވާ ގާ ކުނޑި އެ ކުންފުނިން ނުނަގާނެ ކަމަށްވެސް ބުނެފައިވެއެވެ.
