ހެލްތު މިނިސްޓަރު އަބްދުﷲ ނާޒިމް އިބްރާހިމަށް އިދިކޮޅު އެމްޑީޕީގެ މެމްބަރު ކުޑޫ ފޮނުއްވި ސިޓީއެއްގައި ވަނީ ރާއްޖޭގައި ގޮތް ނޭނގޭ މަރުތައް އިތުރުވަމުން ދާއިރު، ޕޯސްޓްމޯޓަމް ހެދޭނެ އިންތިޒާމެއް ހަމަޖެހިފައި ނެތުމުން އެކަން ހަމަޖައްސައިދޭން އެދިވަޑައިގަންނަވާކަމަށެވެ.
ކުޑޫގެ ސިޓީގައި ވިދާޅުވީ މިދިޔަ ދެ މަސް ދުވަހުގެ ތެރޭގައި ހަތް މީހުން މަރުވެފައިވާ ކަމަށެވެ. އަދި ޝައްކު އުފެދޭ ގޮތަށް މަރުވާ މީހުންގެ ޕޯސްޓްމޯޓަމް ހެދުމަށް ރާއްޖެ އިން ބޭރަށް ފޮނުވާކަން ފުލުހުން އާންމުކުރާ މައުލޫމާތުން އެނގިވަޑައިގަންނަވާ ކަމަށެވެ. އެގޮތުން ގޮތްނޭނގޭ މަރުތަކަކީ ރައްޔިތުންގެ ކަންބޮޑުވުން އޮންނަ ކަމެއްކަމަށާއި އެފަދަ ކަންކަމުގެ ހަގީގަތް އާންމުންނަށް އޮޅުންފިލުވައިދޭން ޖެހޭކަމަށް ކުޑޫގެ ސިޓީގައިވެއެވެ. އަދި ރާއްޖޭގައި ޕޯސްޓްމޯޓަމް ހެދޭނެ ގޮތް ހަމަޖެއްސުމުން، އެކަމަށް ދައުލަތުގެ ބަޖެޓުން ކުރާ ހޭދަ ކުޑަވެގެންދާނެކަމަށްވެސް ހެލްތް މިނިސްޓަރަށް ކުޑޫ ފޮނުއްވި ސިޓީގައިވެއެވެ.
ޕޯސްޓްމޯޓަމް ހެދުމުގައި އަމަލުކުރަންޖެހޭ އިޖުރާއަތްތައް ޖިނާއީ އިޖުރާއަތުގެ ގާނޫނުގައި ބަޔާންކޮށްފައިވާ ކަމަށާއި ޖިނާއީ ކުށަކާ ގުޅިގެން މަރުވެފައި މީހެއްގެ މަރުވި ސަބަބު ދެނެގަތުމަށް އަދި ގޮތް ނޭނގޭ މަރުތަކުގެ ހަގީގަތް ދެނެގަތުމަށް މަރުވެފައިވާ މީހާގެ ހަށިގަނޑުގެ ޕޯސްޓްމޯޓަމް ހެދުމުގެ އިހްތިޔާރު ފުލުހުންނަށް ދީފައިވާކަން ކުޑޫގެ ސިޓީގައި ފާހަގަކުރައްވާފައިވެއެވެ.
ނެޝަނަލް ސްޓޭންޑާޑް ފޯ ފޮރެންސިކް މެޑިކަލް ސާވިސް އިން މޯލްޑިވްސް' ވަނީ އާންމުކޮށްފައިވާކަމަށާއި ފޮރެންސިކް ތަހުލީލުތަކާއި ޕޯސްޓްމޯޓަމް އާއި އެފަދަ ތަހުލީލުތައް ކުރާނެ ސިއްހީ ހިދުމަތް ދޭނެ މަރުކަޒެއް ނޫނީ އިދާރާއެއް ކަނޑައަޅާނީ މިނިސްޓަރު ކަމަށް ސިއްހީ ހިދުމަތުުގެ ގާނޫނު ބުނާކަން ކުޑޫގެ ސިޓީގައި ވަނީ ފާހަގަކުރައްވާފައެވެ. އެހެންކަމުން ރާއްޖޭގައި ޕޯސްޓްމޯޓަމް ހެދުމުގައި ގާނޫނީ ހުރަހެއް އޮތް ކަމަށް ނުފެންނަކަމަށާއި މިކަންތައް ވީ އެންމެ އަވަސް މުއްދަތެއްގެ ތެރޭގައި ފައްޓަވައިދެއްވުން އެދޭކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމަށް އިދިކޮޅު އެމްޑީޕީގެ މެމްބަރު މަޖިލީހުގެ ގަލޮޅު އުތުރު ދާއިރާގެ މެމްބަރު މުހައްމަދު އިބްރާހިމް ފޮނުއްވި ސިޓީގައިވެއެވެ.
ރޭވެސް ކުއްލި ގޮތަކަށް މީހަކު މެރުވެފައިވާއިރު މިދިޔަ ހޮނިހިރު ދުވަހު ވަނީ މާލޭގެ ގެސްޓްހައުސްއެއްގެ ފާހާނާތެރޭގައި، މަރުވެފައި އޮތް މީހަކު ވަނީ ފެނިފައެވެ. މިދިޔަ މަހެެއްހާ ދުވަހުގެ ތެރޭގައި މަރުވެފައި އޮއްވާ ހަ މީހަކު ވަނީ ފެނިފައެވެ.
