އެ މިނިސްޓްރީން މިއަދު ކުރި އިއުލާނެއްގައި ބުނީ ރާއްޖެއިން ބޭރުން ދިވެހިރާއްޖެއަށް އަންނަ ތެޔޮ ޓޭންކަރުތަކާއި ކެމިކަލް ޓޭންކަރުތަކާއި އަދި ގޭސް ކެރިއާ ތަކުގައި ޖެނެރަލް ކާގޯ އުފުލުމަކީ އަބަދުވެސް މަނާކަމެއްކަމަށެވެ. މިގޮތަށް ޖެނެރަލް ކާގޯ އުފުލުމަކީ މި ފަދަ އުޅަނދުފަހަރު އޮޕަރޭޓް ކުރުމަށް އެ އުޅަނދުފަހަރު ރަޖިސްޓަރީ ކޮށްފައިވާ ގައުމަކުން ދޫކޮށްފައިވާ ހުއްދަތަކާ ފުށުއަރާ ކަމެއްކަމަށްވެސް އެ މިނިސްޓްރީން ބުނެއެވެ.
އެހެން ކަމުން، ދިވެހިރާއްޖޭއަށް އަންނަ ތެޔޮ ޓޭންކަރުތަކާއި ކެމިކަލް ޓޭންކަރުތަކާއި އަދި ގޭސް ކެރިއަރު ތަކުގައި ޖެނެރަލް ކާގޯ ނުއުފުލުމަށް އުޅަނދުފަހަރު އޮޕަރޭޓް ކުރައްވާ ފަރާތްތަކަށާއި ޝިޕިން އެޖެންޓުންނަށާއި އަދި އުޅަނދުގެ ވެރިފަރާތްތަކަށް އަންގާ ކަމަށް ޓްރާންޓްޕޯޓުން މިއަދު ކުރި އިއުލާންގައިވެއެވެ.
މިނިސްޓްރީން މިކަން އަންގާފައި މިވަނީ ތެޔޮ އުފުލި ބޯޓެއްގައި ވަގަށް ރާއްޖެއަށް ސިނގިރޭޓްތަކެއް އެތެރެކުރި މައްސަލަ ފެންމަތިވެ އެ މައްސަލަ ބަލަމުން ދަނިކޮށެވެ.
