މޭރީގެ މަރުގެ މައްސަލާގައި ޝަރީއަތް ނިމެންދެން ބަންދުކޮށްފައި ހުރި ލަމްހާ، ބަންދުން ދޫކޮށްލަން ކްރިމިނަލް ކޯޓުން ނިންމީ މިދިޔަ އަހަރުގެ ނޮވެމްބަރު މަހުގެ 12 ގައެވެ. އެ މައްސަލަ ޕީޖީން ހައިކޯޓުގައި އިސްތިއުނާފުކުރުމުން ހައިކޯޓުގެ ރަޖިސްޓްރާ ނިންމެވީ އެ މައްސަލަ ބަލައިނުގަންނާށެވެ. ހައިކޯޓަށް މައްސަލަ ބަލައިނުގަންނަން ރެޖިސްޓްރާ ނިންމެވުމުން ޕީޖީ އަނެއްކާ އެ މައްސަލަ ފަނޑިޔާރުންނަށް އެޕީލް ކުރިއެވެ.
އެ މައްސަލަ ފަނޑިޔާރުންނަށް އެޕީލް ކުރުމުން، ފަނޑިޔާރުންގެ ބެންޗުގެ މެޖޯރިޓީން ނިންމީ ހައިކޯޓުގެ ރަޖިސްޓްރާއަށް ތާއީދުކޮށެވެ. އެކަމަކު މައިނޯރިޓީ ރައުޔަކީ ރަޖިސްޓްރާގެ ނިންމުން ރަނގަޅު ނޫން ކަމަށެވެ.
ހައިކޯޓްގެ ނިންމުން ދައުލަތުން ސުޕްރީމްކޯޓަށް ހުށައެޅުމުން އެ ކޯޓުން ނިންމީ ލަމްހާ ބަންދުން ދޫކޮށްލަން ކްރިމިނަލް ކޯޓުން އަމުރުކުރި މައްސަލަ ނުބަލަން ހައި ކޯޓުން ނިންމި ނިންމުން ގޯސްކޮށް ކަމަށެވެ. އަދި 10 ދުވަސް ތެރޭގައި އެ މައްސަލަ ހުށަހަޅައިފިނަމަ ހައި ކޯޓުން އެ މައްސަލަ ބަލައިގަތުމަށް ސުޕްރީމް ކޯޓުން ވަނީ އަންގާފައެވެ.
ދަށު ކޯޓުން ލަމްހާ ދޫކޮށްލިނަމަވެސް އެ މައްސަލާގައި ދައުވާ ލިބޭ މާވިން އަދިވެސް ހުރީ ބަންދުގައެވެ.
ލަމްހާ ދޫކޮށްލާފައި ވަނީ ހަ ޝަރުތެއް ކުރުމަށްފަހު އެވެ. އޭނާ ރާއްޖެއިން ފުރައިގެން ނުދިއުމަށާއި، ގާނޫނާ ހިލާފު އަމަލެއް ނުކުރުމަށާއި، ކޯޓަށް ގަޑިއަށް ހާޒިރުވުމަށާއި، ޒަރޫރީ ބޭނުމެއްގައި ނޫނީ ގެއިން ބޭރަށް ނުދިއުމަށާއި، މައްސަލައިގެ ހެކިންނާއި މޭރީގެ އާއިލާއާ ބައްދަލު ނުކުރުމަށާއި، ވަކި ގަޑިތަކެއްގައި ގޭގައި ހުރުމަށް އަމުރުކޮށްފައި ވެއެވެ.
ކުރިންވެސް އެއް ފަހަރު ލަމްހާ ބަންދުން ދޫކޮށްލުމުން ދައުލަތުން ހައިކޯޓުގައި މައްސަލަ އިސްތިއުނާފުކޮށް އަލުން ލަމްހާ އޭރު ހައްޔަރު ކުރި އެވެ.
