މިއީ މިދިޔަ ޑިސެމްބަރު މަހު މި މަގާމަށް ކުރި އިއުލާނާ ގުޅިގެން އެކަށީގެންވާ އަދަދަކަށް އެޕްލިކޭޝަން ލިބިފައި ނުވާތީ އަލުން ކުރި އިއުލާނެކެވެ.
އޭސީސީން ބުނީ ކުރިން މި މަގާމަށް އެދި ހުށަހެޅި ފަރާތްތަކުން އަލުން އެޕްލިކޭޝަން ހުށަހަޅަން ބޭނުންވާނަމަ، އެޕްލިކޭޝަން ފޯމު އެކަނި ހުށަހެޅުމުން ފުދޭނެ ކަމަށެވެ. މި މަގާމަށް ކުރިމަތިލެވޭނީ 18 އަހަރާއި 55 އަހަރާ ދެމެދުގެ އުމުރުފުރައިގެ، އޭސީސީން ކަނޑައަޅާފައިވާ ޝަރުތުތައް ހަމަވާ ފަރާތްތަކަށެވެ.
އެސްޖީގެ މަގާމަކީ ފަސް އަހަރުގެ ދައުރަކަށް އައްޔަންކުރާ މަގާމެކެވެ. މި މަގާމުގެ މަސްއޫލިއްޔަތުތަކުގެ ތެރޭގައި ކޮމިޝަން އިދާރީގޮތުން ހިންގުމަށް ބޭނުންވާ ސިޔާސަތުތައް މެމްބަރުންގެ ލަފާގެ މަތިން އެކުލަވާލައި، ހިންގައި ބެލެހެއްޓުން ހިމެނެއެވެ.
މި މަގާމަށް އެދި ހުށަހެޅުމުގެ ސުންގަޑިއަކީ މި މަހުގެ 28 ވަނަ ދުވަހުގެ 14:00 އެވެ.
